Pagara mo-k.o. ni Herrera sa PPXX

CEBU, Philippines - Misaad og "knockout" nga kadaugan si ALA Boxing Gym fighter Jason 'El Niño' Pagara (25-1, 17KOs) sa pagdepensa sa iyang WBO International light welterweight title batok ni Mexican challenger Aaron 'Jewel' Herrera (30-2, 19KOs) sa main event sa "Pinoy Pride XX: Laban Kung Laban" fight card ugma sa gabii didto sa Waterfront Cebu City Hotel and Casino.

Sa nagkadinang kapildihan sa mga Filipino boxers sa mga kamot sa Mehikano nilang kaatbang, si Pagara

nagtuo nga siya ang mohatag pagbalik og daog sa nasud.

"Importante gyud ni nako nga modaog, mao nang ako gyud siyang tumbahon," matud pa ni Pagara atol sa press conference kagahapon didto sa Aegean room sa Waterfront Hotel.

Sa miaging adlaw, si Herrera misaysay nga kaya ra niyang pildehon si Pagara tungod kay wala kini ispesyal nga abilidad nga gituohan sa kadaghanan.

"Kung mao na iyaha gituohan, aw ato lang tan-awon ibabaw sa ring, pero ako gyud siyang i-knockout," matud pa sa garbo sa Cagayan de Oro City.

Nakadugang usab sa inspirasyon ni Pagara mao ang pagduol niya sa iyang damgo nga moaway alang sa world title. Si Pagara mao karon ang rank No. 5 sa light welterweight division sa World Boxing Organization.

Sa supporting bout, si Genesis 'Azukal' Servania (19-0. 7KOs) modepensa sab sa iyang WBO Asia-Pacific super bantamweight title batok ni Indonesian fighter Isack Junior (20-3, 8KOs).

Sama ni Pagara, si Servania kinahanglan mohimo sab og imprisyon aron ipamatuod nga angayan siya sa gihatag nga kahigayonan sa Top Rank Inc. nga moaway didto sa Macau sa Hulyo sa undercard sa WBO/WBA flyweight showdown tali nila ni Mexican champion Juan Francisco Estrada ug Milan  Melindo.

Si Jimrex 'The Executioner' Jaca (37-6, 21KOs), mosuway pag-ilog sa bakanteng WBO Oriental light

welterweight title batok ni Mexican Emilio 'Gigante' Perea (22-2, 14KOs).

Ang official weigh-in sa maong fight card himuon karong buntag didto sa Event Center sa SM City-Cebu.