CEBU, Philippines - Nadepensaan ni Cebuano fighter Renan 'Limbas' Noblefranca ang iyang Yaw-Yan Fighting Challenge Championship (YFCC) junior lightweight title human sa iyang impresibong first round knockout nga kadaugan batok ni Arnel 'Ronin X' Ylanan sa Team Project X sa main event sa "Bakbakan sa San Remigio" kickboxing fightcard sa imaging gabii didto sa Artemio Masbate Sports Complex sa San Remigio, Cebu.
Nagbinayloay dayon ang duha ka protagonista sa ilang bangis nga ataki, apan si Noblefranca maoy
mipatigbabaw gamit iyang bangis nga kombinasyon nga gitapos sa usa ka patid sa kuto-kuto nga mipalop-og ni Ylanan sa 2:25 sa first round.
Mao kini ang unang pagdepensa ni Noblefranca sa bakus nga iyang nailog pinaagi sa "unanimous decision" nga kadaugan batok ni Steve Sevilleno sa Mindanao Unified Mixed Martial Arts (MMA) niadtong Hulyo sa miaging tuig diha sa Cebu Coliseum.
Gawas ni Noblefranca, duha ka Yaw-Yan ArDigma fighters ang nidaog sab sa ilang tagsa-tagsa ka mga away.
Si Jordan 'Labuyo' Balcita mipaundang ni Universal Reality Combat Championship (URCC) veteran Johnjier 'Dangerous'
Torbiso sa Durex Dragon Kickboxing Club sa 1:59 sa second round, samtang si Lemuel 'Musang' Maglinte midaog pinaagi sa "unanimous decision" batok sa teammate ni Torbiso nga si Elmer 'Striker' Dakay.
Tulo usab ka fighters sa Durex Dragon ang nangapilde batok sa tagsa-tagsa nilang kontra. Si Axel 'Specialist'
Torbiso napukan ngadto ni John Dave 'Dancing Man' Epile, si John Edu 'Excalibur' Torbiso miyukbo ngadto ni Joel
'Bomberman' Regabo ug Junrey 'Tongboo' Soquite napilde sa puntos batok ni Ronilo 'Buffalo' Esfra.
Sa laing mga duwa, si Niñi Reo 'Tatos' Saoy miiskor og first round stoppage batok Rogelio 'Experiment'
Ylanan, si John Carlo 'Baby Face Assassin' Haganas mipilde ni Edmar 'Black Fighter' Sumbi ug si Marvin 'The Martian'
Rabanoz mimakmak ni Jan 'Luningning' Andayo. (BANAT PALARO)