Prime asia tinguha moposte sa ika-10 nilang daog

CEBU, Philippines - Tinguha sa Prime Asia Lending/UV Lancers nga moposte og 10 game elimination round sweep dihang magbagat sila  pag-usab batok sa Gaisano Capital South/UC Webmasters sa   Enervon CESAFI Partner’s Cup 2013 basketball tournament karong adlawa didto sa Cebu Coliseum.
 Ang Prime Asia ug Gaisano Capital magsangka sa alas-6:30 sa gabii sa triple-header nga naglakip sa Cebu Landmasters/USC Warriors batok Raphael's Cafe/USJ-R Jaguars sa opener sa alas-3 sa hapon. Ang Lion Tiger/USPF Panthers ug San Marino Tuna/CIT-U Wildcats magtigi sa ikaduhang duwa sa alas-4:45 sa hapon.
 Ang Prime Asia ni coach Felix 'Donbel' Belano Jr. miinat sa ilang limpyong baraha ngadto sa siyam ka daog human nila gilubong ang Cebu Landmasters, 94-71 sa miaging gabii didto sa San Remigio, Cebu.
 Nagsalig ang Prime Asia sa tandem nilang John Michael Abad ug big man Wowie Escocio sa pagtumba sa Cebu Landmasters. Si Abad miposa og 24 puntos, samtang si Escocio miamot og 20 puntos. Ang Nigerian recruit nga si Steve Cedrick Akomo miabag sab pinaagi sa iyang 14 puntos.
 Ang Prime Asia milabaw lang og tres puntos human sa tulo ka kuwarter, 57-54, apan milusad kini og makabungog nga 37-17 run sa final period aron moposte og 23 puntos nga kadaugan.
 Silang Ian Ortega ug Nico Magat parehong mibahog og 16 puntos aron pangulohan ang Cebu Landmasters nga nagbitbit karon og 5-4 nga baraha uban sa Gaisano Capital.
 
PUNTOS MATAG USA

Prime Asia/UV (94) - Abad 24, Escocio 20, Akomo 14, Perolino 8, Octobre 8, Babia 6, Arong 6, Santillan

3, Codilla 2, Marquez 2, Mendoza 1
 Cebu Landmasters/USC (71) - Ortega 16, Magat 16, Duran 15, Adlawan 11, Pepito 4, Que 4, Guardiario 3,

Seno 2