CEBU, Philippines - Mihimo'g dakung papel sa ilang kadaugan kagahapon si Joakim Noah kinsa mibahug og 24 puntos uban sa iyang 14 ka rebounds aron baswaton ang piangon nga Chicago Bulls aron palagpoton ang host Brooklyn Nets sa Game 7 sa iskor, 99-93 ug mi-abante ngadto sa second round sa NBA playoffs.
Mihimo'g 12-of-17 shots gikan sa field si Noah ug mihimo sab og unom ka block shots.
Tungod sa maong kadaugan, miabante sila ngadto sa second-round clash sa Eastern Confence diin ilang ikasangka ang defending NBA champions Miami Heat ugmang adlawa.
Ang Chicago nagduwa nga wala ang ilang forward nga si Luol Deng, ang ilang scoring leader sa regular season kinsa nagpa-ospital didto sa Chicago.
Ang Briton nga si Deng wala na makaduwa og unom ka higayon tungod sa usa ka flu-like symptoms nga nag-anam kagrabe ug posibleng mikumplikar kini sa usa ka kaso sa meningitis.
Wala sab makaduwa sa Chicago ang ilang star nga si Derrick Rose sa tibuok season tungod kay nagpailawom pa kini sa rehabilitation gikan sa usa ka piang sa tuhod. Wala sab makaduwa ang laing guard nga si Kirk Hinrich kinsa aduna sa'y piang sa iyang bagtak.
Mihimo og 16 puntos sa first half si Noah aron pangulohan ang laing tulo ka players sa Chicago nga mi-iskor og double figures.
"He gets us established. He does a lot of things offensively with his passing and getting to the offesive boards, and then he anchors our defense," matod pa ni Bulls coach Tom Thibodeau.
Midugang og 24 puntos si Marco Belinelli ug silang Carlos Boozer ug Nate Robinson midugang og 17 ug 12 puntos, matag usa.
Si Deron Williams maoy nangu sa Nets sa iyang 24 puntos ug si Brook Lopez mikabkab og 21 puntos uban sa iyang siyam ka rebounds ug may 19 puntos si Gerald Wallace. (BANAT PALARO)