CEBU, Philippines - Midaog dayon ang defending champion Lancers ug ang tournament darkhorse nga Easternians sa pagbukas
niadtong Lunes sa Coke PBA Youngstars Basketball Tournament 2013 Cebu Leg didto sa SHS gym sa Gen. Maxilom
Avenue, ning dakbayan.
Gipanitan sa Lancers ang Cebu Greywolves sa iskor nga, 60-22, samtang gilubong sab sa Easternians ang
Team Panthers, 76-58.
Ang Lancers nga maoy second placer sa Taytay team sa miaging tuig atol sa national finals, sayo kaayong
nakapundo og dakung labaw ug gitapos ang halftime sa iskor nga 31-8.
Si Jun Kent Manzo maoy nangu sa Lancers sa iyang 20 puntos, samtang si Theo Joshua Flores midugang og
12 puntos.
Sa laing bahin, ang Easternians ni coach Rodmark del Rosario, misalig kang Denzel Sabroso nga miposa og 21
puntos aron maoy mangu sa kadaugan, gisundan ni Mark Vincent Berdera nga adunay 16 puntos.
Sa laing mga duwa, ang Team Eagles midagit sab og daog batok sa ACES, 73-29 ug ang Perfect Sports
Outfit/One-on-One midaog batok sa Bohol-based Golden Dragons sa iskor nga 86-72.
Ang Cebu leg sa Coca-Cola PBA Youngstars maoy usa sa 12 ka torneyo nga gipahigayon sa nagkalain-laing
dapit sa nasud panahon sa summer.
Ang Cebu champion makigsangka batok sa Bacolod ug Iloilo diin ang regional champion maoy morepresentar
sa Visayas alang sa national finals didto sa Manila unya sa Mayo 19-26. (BANAT NEWS)