CEBU, Philippines - Mikulit sa ilang ikaduhang daog ang San Marino Tuna-CIT-U human ilang gipukan ang Lion Tiger Katol-USPF kagahapon sa iskor, 91-82 ug nagsolo na karon sa ikaduhang pwesto sa nagpadayong Enervon CESAFI Partner's Cup 2013 basketball tournament didto sa Cebu Coliseum.
Ang tulo ka triples ni Franklyn Batiquin sa fourth period maoy usa sa rason nganong naka-inat ang San Marino diin ang iyang unang three-pointer maoy naghatag kanila'g 68-66 nga abante. Gikan niadtong tungora, wala na maka-apas ang Lion Tiger kinsa nailhan sab sa pagkakugihan mohimo'g comeback.
Ang laing duha ka triples ni Batiquin gisundan pa gyud sa laing tres ni Kendrick Brigoli aron inaton ang labaw ngadto sa 15 puntos, 87-72 may tres minutos pa ang nahibilin sa duwa.
Hinoon, si Allan Dimco maoy naghatag og dakong danyos sa San Marino tungod kay siya maoy nangu sa opensa sa iyang 25 puntos aron tabangan ang iyang team nga mokulit ug 2-1 nga baraha.
Mibahug sab og duha ka three-pointers si John Graf samtang nakatabang gihapon si Joshua dela Cerna kinsa miposa og 10 puntos ug medyo dako'g deperensiya sa iyang 22 puntos sa miaging gabii dihang midaog sila batok sa Raphael's Cafe, 80-66.
Naglabaw sab dayon ang San Marino sa halftime, 38-47.
Bugtong si Art Camello lang nga player sa Lion Tiger nga makahimo'g double figures sa iyang 10 puntos apan wala kaayo makahuygo silang Joseph Sedurifa ug Jomar Sollano.
Ning pagsuwat sa alas 6:30 kagabii, padayon pang nagkumbati ang Gaisnao Capital South-UC kinsa miparada sa ilang bag-ong import nga si Arnold Noah batok sa wala pay daog nga Raphael's Cafe .
Puntos matag usa:
San Marino (91) —Dimco 25, Dela Cerna 10, Batiquin 9, Menguito 8, Brigoli 7, Graf 6, Taboada 5, Bucao 5, Ebona 4, Booc 4, Taghoy 3, Tabalin 3, Infante 2.
Lion Tiger (82) — Camello 14, Sedurifa 9, Batucan 9, Sollano 8, Cando 8, Cavalida 6, Escanilla 6, Nudalo 4, Ceniza 4, Virtucio 4, Sastrillas 4, Mangaron 2, Borces 2. Halftime: 47-38. (BANAT PALARO)