UV, USJ-R midaog dayon sa Nestea Beach Volley

CEBU, Philippines -  Gisugdan sa defending men's champion University of the Visayas (UV) ang ilang kampanya pagpanalipod sa korona pinaagi sa paglansang og daog sa pagsikad sa 16th Nestea Beach Volley National Finals didto sa Boracay island.

 Ang tandem nilang Mike Abria ug Jade Becaldo misugod  sa ilang kampanya uban ang 21-19, 21-16 nga kadaugan batok sa University of Mindanao (UM)-Tagum nilang Gilbuena Haclaiah ug Jefty Amora.

 Laing team gikan sa Sugbu nga University of San Jose-Recoletos (USJ-R) nga gibidahan nilang Jade Illut ug Jason Uy miposte sab og daog sa una nilang duwa batok sa Calayan Educational Foundation Inc. nilang Jeorge Cartney Pantoja ug Jomari Joshua Herrera, 21-11, 21-9.

 Ang University of Southern Philippines Foundation (USPF) mipakita sab og maayong tilimad-on dihang sila si Edmar Bonono ug Edward Ybañez midaog batok nilang John Carlo Lozada ug Jophius Christian Banang sa Arellano

University. Apan ang ilang women counterparts sa tandem nilang Rochelle Rica ug  Apple Saraum napilde batok sa La Salle-Taft nilang Jeushl Wensh Tiu ug Kim Fajardo, 21-14, 19-21, 15-5.

 Napilde sab ang Southwestern University (SWU) nilang Danika Yolanda Gendrauli ug April Aguilar ngadto sa women's two-time defending champion Central Philippines University (CPU) nilang Jovelyn Gonzaga ug Fiola Mae Ceballos, 21-15, 21-18.