Prime Asia mipilde sa Lion-Tiger

 CEBU, Philippines - Miaksiyon og katidlom ang dakung labaw sa Prime Asia Lending sa third period, apan salamat sa mas

kasaligan nga line-up ug nakarekober kini uban ang 88-75 nga kadaugan batok sa Lion-Tiger Katol sa Enervon CESAFI

Partners' Cup 2013 basketball tournament kagahapon didto sa Cebu Coliseum.

 Sa maong kadaugan, ang Prime Asia maoy nakigsawo sa Cebu Landmasters sa liderato sa managsama nilang

2-0 win-loss records.

 Ang Prime Asia mipakita sa ilang kamangtas sama sa ilang gihimo ngadto sa Gaisano Capital South niadtong

Domingo dihang mitukod sila og 29 puntos nga bentaha, 52-23 sa second period sa three-pointer ni Rhaffy Oktubre.

 Apan napausab sa Lion Tiger ang tiyempo sa duwa sa third period dihang ilang gikagisan ang makabungog nga

labaw ngadto na lang sa nuybe puntos, 54-63 human sa basket ni Joseph Sedurifa. Hinuon wala magdugay ang gipakitang

kabangis sa Lion Tiger Katol kay ang Prime Asia hinay-hinay nga mibingat  sa ilang labaw.

 Si John Michael Abad, kinsa mitusak og tulo ka triples sa unang kuwarter maoy nangu sa Prime Asia pinaagi sa

iyang 14 puntos,  gisundan ni  Wowie Escocio nga adunay 11 puntos, samtang sila si Alfred Codilla ug Vincent Mendoza

mitimbre og 10 puntos matag usa.

 Ang 1-1 nga Lion-Tiger Katol gipangulohan sab ni Sedurifa, kinsa mikadlit og 10 puntos. (BANAT NEWS)