CEBU, Philippines - Sugdan dayon sa defending champion Prime Asia-UV Green Lancers ang ilang title defense batok sa Gaisano
Capital South-UC Webmasters sa pagsikad sa 7th CESAFI Partners' Cup karong adlawa didto sa Cebu Coliseum.
MGA DUWA KARON
(Cebu Coliseum)
3:00 pm
Prime Asia-UV vs.
Gaisano Capital South-UC
4:45 pm
Raphael’s Cafe-USJR vs.
Lions Katol-USPF
6:30 pm
San Marino Tuna-CIT-U vs.
Cebu Landmasters-USC
Ang tanang unom ka koponan moduwa karong adlawa diin ang Raphael's Cafe-USJR Jaguars makigbugno sa
Lions Katol-USPF Panthers sa ikaduhang duwa sa alas-4:45 sa hapon.
Sa main game nga gikatakda sa alas-6:30 sa gabii, ang San Marino Tuna-CIT-U Wildcats moharong sa Cebu
Landmasters-USC Warriors.
Aron mahatagan ang tanang magduduwa og dugang exposure alang sa pagpangandam sa regular CESAFI
season karong Hulyo, ang torneyo motamod gihapon sa barangayan format. Sa 15 ka players matag team, lima ka
magduduwa moduwa sa tibuok kuwarter nga walay "substitution" hangtod sa third period. Adto na kini pulihan sa fourth
period.
Ang Prime Asia ni coach Felix 'Donbel' Belano Jr. magsalig gihapon sa iyang players sa miaging season nga
pangulohan ni 6-foot-7 Nigerian recruit Steve Cedric Akomo.
Sa laing bahin, ang Gaisano Capital South dili kaayo kahadlokan tungod kay wala na ang uban nilang sinaligan
gawas lang sa pagbalik ni shooter Gerald Ampoon. Ang uban nilang sinaligan migradwet na ug usa niini mao ang pointguard
nga si Brian Quinton Heruela, kinsa nagduwa na karon sa PBA D-League.
Duha ka corporation backers ang mohimo sa ilang debut -- ang Raphael's Cafe nga gilangkuban sa USJR ug
ang Cebu Landmasters nga langkuban sa USC.
Ang Raphael’s Cafe, usa ka bag-ong resto bar nga gipanag-iya ni Christian Senining nga anaa mahimutang sa
dalan Andres Abellana maoy mihulip sa Ave Maria Sanctuary Park nga gipanag-iya sa iyang amahan nga si Raffy Senining.
Ang Ave Maria ni coach Edito Salacut kanhi kampiyon sa Partners' Cup.
Ang Cebu Landmasters mopakita sa una nilang labok sa Partners' Cup, apan niduwa na kini og mga
commercial leagues dinhi sa Sugbu.
Sa nanglabay'ng katuigan, ang San Marino Tuna maoy mipaluyo sa USC Warriors, apan karon nagpaluyo sa
CIT-U Wildcats, samtang ang Lions Katol (kanhi Lion-Tiger Katol) pagarepresentahan sa USPF Panthers.
Ang mga duwa sa Partners' Cup himuon matag adlaw'ng Martes, Huwebes ug Sabado. (BANAT NEWS)