SWU molarga na alang sa FilOil Flying V caging

CEBU, Philippines - Mogikan na karong buntag ang Southwestern University (SWU) Cobras alang sa ilang pagsalmot sa 7th FilOil Flying V Premier Cup nga gikatakdang sugdan karong Sabado didto sa Arena sa San Juan City.

Ang SWU maoy labing unang provincial team nga mopakita'g aksiyon sa prestihiyosong liga sukad kini natukod niadtong 2006.

Ang reigning Cebu Schools Athletic Foundation Inc. (CESAFI) men's basketball champion moharong sa top teams gikan sa UAAP ug NCAA.

"Lisud kini nga hagit alang kanamo kay moduwa mi batok sa labing maayong mga teams sa nasud," matud pa ni SWU coach Raul 'Yayoy' Alcoseba.

Ang Cobras nasulod sa Group B uban sa defending UAAP titlist Ateneo Blue Eagles, La Salle Green Archers, University of Santo Tomas (UST) Growling Tigers, University of the East (UE) Red Warriors, San Sebastian College (SSC) Stags, Letran Knights, Lyceum Pirates, Arellano University Flaming Arrows ug Emilio Aguinaldo College (EAC) Generals.

Nag-abot sa Group A mao ang NCAA champion San Beda (SB) Red Lions, Perpetual Help  Atlas, National University (NU) Bulldogs, Far Eastern University (FEU) Tamaraws,  Adamson University Falcons, University of the Philippines (UP) Maroons, St. Benilde College Blazers ug Jose Rizal University (JRU) Heavy Bombers.

Mosugod ang SWU sa ilang kampanya batok sa Ateneo sa Sabado sa alas-6 sa gabii.