CEBU, Philippines - Pormal nang miabante sa playoffs sa Eastern Conference ang Milwaukee Bucks human ilang gilubong ang Toronto Raptors, 100-83 kagahapon sa nagpadayong duwa sa NBA didto sa Bradley Center sa Milwaukee, Wisconsin.
Usa sa nanegurong makuha nila ang ikawalong pwesto sa East mao si Monta Ellis kinsa maoy nangu sa ilang opensa pinaagi sa iyang 22 puntos. Mihimo sab siya'g siyam ka assists ug unom ka steals.
Mao kadto'y unang playoff berth sa Bucks sulod sa miaging tulo ka seasons.
''It feels great. We needed this game tonight. We knew how big it was for us. Now we can start getting focused on finishing the season, trying to go in a positive direction and get ready for the playoffs, '' matud pa ni Ellis.
Midugang og 16 puntos si Brandon Jennings ug may pito ka assists alang sa Bucks samtang si Larry Sanders miamot og 12 puntos uban sa iyang siyam ka rebounds ug unom ka blocks.
Kinahanglan lang sa Milwaukee nga modaug ug modaug ang Miami batok sa Philadelphia aron hingpit na makuha ang luna sa playoffs. Tuod man, midaug ang Heat batok sa Sixers, 106-87.
Misikit sab ang Milwaukee ngadto sa duha ka duwa batok sa Boston Celtics alang sa ikapitong luna sa playoffs.
Si Alan Anderson maoy nangu sa Toronto sa iyang 14 puntos gikan sa bench samtang ang rookie nga si Quincy Acy migimo'g career-high 13 puntos.
Si Rudy Gay kinsa maoy leading scorer sa Raptors sa iyang 18.2 puntos matag duwa, igo lang nakahimo'g season low kuatro puntos.
Ang Raptors igo lang sab mihimo'g 36 percent shooting ug may 18 ka turnovers.
''We came out lethargic, had a hard time getting ourselves going,'' sumala pa ni Raptors coach Dwane Casey. Matod pa gyud ni Casey ''They dictated the tone of the game and we never got it back. We let frustration along with the Milwaukee Bucks spank us tonight. I told the guys, 'If we are serious about being a playoff organization, if we are serious about it, our mental approach has to change.'''
Ang duwa nahimong sikit didto lang sa first quarter apan migamit ang Bucks og 15-4 run sa uwahing bahin sa maong period aron kalit lang molabaw og 24 puntos.
Wala lugaki sa Milwaukee ang Raptors didto sa second half.
Sa laing bahin, ang tanan pito ka home teams maoy midaug kagahapon diin gilubong sa Denver ang Houston, 132-114, naka-ipsot ang San Antonio batok sa Atlanta, 99-97, midaug ang Brooklyn batok sa Charlotte, 105-96, gilubong sa Washington ang Indiana, 104-85 ug midaug ang Minnesota batok sa Detroit, 107-101.