CEBU, Philippines - Nangahas si undefeated ALA boxing star Milan 'El Metodico' Melindo (28-0, 11KOs) nga mohimo'g
impresibong kadaugan sa iyang sangka batok ni Indonesian contender Tommy Seran (23-1, 14KOs) sa blockbuster Top
Rank event nga uloha'g "Fist of Gold" karong Sabado didto sa Venetian Hotel sa Macau.
Ang Melindo-Seran showdown usa sa mga supporting bouts sa title defense ni WBO/WBA flyweight
champion Brian 'Hawaiian Punch' Viloria batok ni Mexican challenger Juan Francisco Estrada.
"Moadto ko didto dili lang aron modaog, pero gusto sab ko nga ma-impress ang mga boxing fans ilabi na ang
mga taga-Top Rank," matud pa ni Melindo milupad na paingon sa Macau kagahapon uban ni ALA Promotions Vice
President Dennis Cañete ug ALA Gym chief trainer Edito Villamor.
"Daku ni nga exposure para nako, kahibaw ko duol na kaayo ko sa akong damgo nga world title fight pero
karon pasensiya lang sa ko, agad ra ko sa ALA Promotions," dugang pa ni Melindo.
Si Melindo, 24-anyos, nag-ensayo kapin sa tulo ka buwan ug nakahuman na siya og dul-an sa 200 ka rounds
sa sparring uban ang iyang sparmates nga sila si Rocky Fuentes, Jerson Mancio, Arthur Villanueva ug world champions
nga sila si Merlito Sabillo ug Johnriel Casimero.
"Kita ko sa tape sa iyang (Seran) mga away ug nakita nako nga lig-on siya, pero ipakita nako niya unsa ang
science sa boxing," saysay sa garbo sa Cagayan de Oro City.
Ang WBO International flyweight champion nga si Melindo midaog sa katapusan niyang tulo ka away sa
miaging tuig batok sa mga lig-ong kontra sama nila ni Mexican Juan Esquer ug duha ka kanhi world champions nga sila si Jesus Geles ug Jean Piero Perez. (BANAT NEWS)