27 ra gyud kutob
Natapos niadtong Marso 28 (Huwebes Santo dinhi) ang 27- game winning streak sa Miami Heat dihang nasugamak sila sa Chicago Bulls sa iskor, 101-97 didto sa United Center.
Busa, pabiling wala ma-apas sa Heat ang record nga 33- game streak sa 1971-1972 nga Los Angeles Lakers nga 40 ka tuig nang wala matarug.
Akong nakita sa replay sa NBA Premium nga posibleng naapektohan ang Heat sa pisikal kaayong duwa ilabi na sa nahibiling pipila ka minutos. Duha ka plays ang akong nakita nga tataw pisikal ang duwa dihang gigakos ni Kirk Hinrich si James samtang padung mo-drive o mo-lay up ug ordinaryong foul lang ang gitawag.
Ikaduhang play nga pisikal sab dihang gibanggaan og tuyo ni James si Carlos Boozer ug dihang miaksyon na'g hamag si Boozer kaniya ug daw sa nagkanayon sa atong pinulongan "unya unsa may imong gusto?" milingiw ug mipadayon og dagan si James.
Ang lintunganay niadtong estoryaha nga dili anad ug pisikal nga duwa si James. Medyo may pagka-hambugero siya apan makita sab nga medyo mahadlok sab siya ilabi nang maunhan.
Basin og maglikay lang si James nga ma-technical o ma-thrown out ba hinoon kung magpadala siya sa kainit sa iyang ulo apan sa akong tan-aw medyo may pagka-talawan kini si James kung bangga-bangga na gani sa lawas maoy hisgotan.
Gani mao kanay rason nga bisan mas lig-on ang Heat tali sa Boston Celtics, kanunay gyud silang maglisod kung Celtics ilang ikasangka tungod kay pulos mosukol ang Celtics og pisikal ilabi na silang Kevin Garnett, Paul Pierce ug Rajon Rondo nga usahay mao pay mopalit sa away.
Sa nagpadayong regular season, mas malipay ako kung magpadayon og daog ang Heat aron inig-abot sa playoffs adto na sila makatilaw og pilde kung matumong sila sa gitawag ug "law of averages." (GGM)
- Latest
