KO artist kontra ni Boom Boom
CEBU, Philippines - Usa ka delikadong Mexican knockout artist ang atubangon ni WBO International featherweight champion Rey ‘Boom Boom’ Bautista kinsa mobalik og away sa Abril 20 didto sa Davao.
Ang Boholano boxer moaway ni Jose ‘Negro’ Ramirez sa main event sa Pinoy Pride XIX didto sa University of Southern Philippines (USP) gym.
Kini ang unang title defense ni Bautista sa iyang bakus nga iyang nasakmit niadtong Oktobre 10 batok ni Mexican Daniel Ruiz pinaagi sa split decision didto sa SM Mall of Asia Arena.
Si Bautista nagkanayon nga seguradong aduna gyuy matumba sa maong away tungod kay sama sa iyang kontra desidido usab siya nga mohimo og knockout nga kadaugan.
Dili kakompiyansahan si Ramirez tungod kay ang katapusang lima ka sunod-sunod nga daog niini nagagikan sa knockout rason nga kinahanglan magbantay ang ALA boxer sa maong away.
Si Ramirez adunay 15 knockouts sa 24 niini ka daog uban ang tulo ka pilde, samtang si Bautista dili usab magpauwahi sa iyang record nga 34-2, 25KOs.
Sa supporting main-event, moaway usab si OPBF champion Rocky Fuentes batok sa Mehikano nga si Juan Kanton, samtang si Marco Demecillo sa RWS stable musuway pag-ilog sa OPBF super flyweight title ni Arthur Villanueva. (LPM gikan sa Philboxing)
- Latest
