CEBU, Philippines - Mirehistro og 16 sa iyang 20 puntos si John Pajantoy sa final period aron baswaton ang team Olkas sa 80-75
nga kadaugan batok sa Ilihan sa pagbukas sa 1st Lou Ornopia Basketball Tournament niadtong Sabado didto sa Brgy.
Calambua open court sa San Remigio, Cebu.
Apan si Jei Dablo maoy leading scorer sa Olkas nga mibugha og 36 puntos. Hinuon daku sab og papel ang
Southwestern University (SWU) Cobras cager nga si Pajantoy ug maoy nagsilbeng bayani alang sa Olkas dihang iyang
gipas-an ang opensa sa iyang koponan paingon ngadto sa kadaugan.
Naglabaw og kuwatro puntos ang Olkas sa halftime, 35-31, apan miaksyon og gukod ang Ilihan sa hinapos
nga bahin sa fourth period.
Hinuon napugngan ang dautang plano sa Ilihan nga mohimo og come-from-behind win.
Si Ronald Romagos maoy nangulo sa Ilihan sa iyang 31 puntos.
Sa sayo pa, ang San Miguel midaog sab human ilang gilubong ang Lamac sa iskor nga 73-51.
Ang usa ka buwan nga torneyo usa sa mga highlights sa kapistahan sa Brgy. Calambua sa Abril 13,
pahinungod sa ilang mahal nga patron San Vicente Ferrer.
Ang kampiyon mobulsa og P10,000, samtang ang second hangtod sa fourth placers makadawat og P7,000,
P5,000 ug P3,000 (BANAT NEWS)
PUNTOS MATAG USA
Unang duwa:
San Miguel (73) - Argawanon 20, Catadman 19, Arnado 10, Armenion 10, Pantaleon 8, Illustrisimo 6
Lamac (51) - Pogado 22, R. Ornopia 15, KJ Cinco 8, K Cinco 4, JK Cinco 2
Ikaduhang duwa:
Olkas (80) - Dablo 36, Pajantoy 20, Demana 10, B. Jubay 4, J. Jubay 4, Obligado 4, Abao 2
Ilihan (75) - Romagos 31, Guaun 16, Neis 11, Ruba 10, Ducante 3, Monterola 2, Ornopia 2