CEBU, Philippines - Milampos ang Alaska Aces sa pagsakmit sa numero unong dapit sa standing human nila gipakgang ang Barako Bull Energy Boosters, 77-73, kagabii sa PBA Commissioner’s Cup didto sa Smart Araneta Coliseum.
Ang kanhi US NCAA standout ug 6-foot-9 import sa Alaska nga si Robert Dozier miantog og 19 puntos ug 20 ka rebounds aron aswaton ang Alaska sa ilang ikatulong sunod-sunod nga daog.
Pulos nagbaga ang opensa ang duha ka koponan nga miresulta sa 67-all nga panagtabla sa 6:32 sa final period, apan mas mipatigbabaw ang estratehiya ni Alaska coach Luigi Trillo batok ni Serbian coach Rajko Toroman sa Barako Bull Energy.
Ang jumpshot ni rookie sensation Calvin Abueva katapusang 1:22 sa duwa maoy naghatag sa Alaska sa singko puntos nga labaw, 75-70, nga maoy miselyo sa daog sa Alaska.
Si Cyrus Baguio miiskor og 10 puntos alang sa Alaska, samtang ang import sa Barako Bull Energy nga si Evan Brock mirehistro og 12 puntos ug 14 ka rebounds. Ang Barako Bull nahagsa sa 2-1 win-loss record. (BANAT SPORT)