CEBU, Philippines - Gipaila na sa World Boxing Organization (WBO) ang mga ring officials nga maoy modala sa WBO light flyweight title bout tali nila ni defending champion Donnie 'Ahas' Nietes sa ALA Gym ug challenger WBO minimumweight champion Moises Fuentes sa Mexico.
Ang Nietes-Fuentes showdown maoy main event sa "Pinoy Pride 18: Champion vs. Champion" sa Marso 2 didto sa Waterfront Cebu City Hotel and Casino.
Sa taho sa Philboxing.com, ang WBO mitudlo ni American referee Jack Reiss nga maoy mo-officiate sa away.
Si Reiss mireperi sa mga dagkung away didto sa Las Vegas, lakip na ang sangka nilang Josesito Lopez ug Victor Ortiz ug Amir Khan-Carlos Molino fight.
Ang tulo ka mga hurado mao sila si Adalaide Byrd sa Las Vegas, Nevada, Patrick Russell sa La Mesa,
California ug Filipino judge nga si Atty. Danrex Tapdasan. Ang fight supervisor mao si WBO Asia-Pacific chief Leon Panoncillo.
Ang two-division world champion nga si Nietes modepensa sa iyang bakus sa ikaduhang higayon human kini niya mailog gikan sa mga kamot ni Mexican Ramon Garcia Hirales pinaagi sa "unanimous decision" niadtong Oktubre 2011 didto sa Bacolod City.