CEBU, Philippines - Makasaksi na sab og laing kulbahinam
nga hardcourt showdown ang mga Sugbuanong basketball fans sa dihang tulo ka PBA teams ang mopakita'g aksiyon sa
tulo ka adlaw nga 2013 Sinulog Cup nga sugdan karong hapon diha sa Cebu Coliseum.
Ang Alaska Aces, Petron Blaze Boosters ug Barangay Ginebra Kings makigbangga sa multi-titled M .Lhuillier
Kwarta Padala-Cebu Niños niining tulo ka adlaw nga torneyo nga magsilbeng final tune-up alang sa umaabot nga PBA
Commissioner's Cup nga mosikad karong Pebrero 8 didto sa Smart Araneta Coliseum.
Ang Cebuano hotshot nga si Dondon Hontiveros uban sa Alaska makigharong karon sa M. Lhuillier sa opening
game sa alas-5 sa hapon, sundan sa duwa tali sa Petron ug Ginebra sa alas-7 sa gabii.
Uban ni Hontiveros sa Alaska mao ang rookie sensation nga si Calvin 'The Beast' Abueva, kanhi miyembro sa
Smart Gilas nga si Jayvee Casio ug laing Sugbuanon nga si Aldrech Ramos, kinsa nakuha sa Alaska gikan sa San Mig
Coffee Mixers human sa multi-trade deal miaging semana.
Sa ilang bahin, ang 6-foot-9 nga si Fajardo mobalik na sab sa pagduwa uban sa Petron human mapalta'g
katunga sa conference sa miaging Philippine Cup tungod sa groin injury.
Ang kanhi University of Cebu (UC) Webmaster standout maghangad usab sa suporta nilang Danny Ildefonso,
Jay Washington, Alex Cabagnot ug Ronald Tubid.
Mangulo sa Ginebra ang ilang leading scorer nga si Mark Caguioa uban nila ni LA Tenorio, Rudy Hatfield,
Mac Baracel ug rookies Chris Ellis ug Keith Jensen.
Iparada usab sa tulo ka koponan ang ilang mga higanteng import nga sila si Robert Dozier sa Alaska, Renaldo
Balkman sa Petron ug Herbert Hill sa Ginebra.
Ang mga tikets mapalit sa tag-P50 sa general admission, P150 sa upper box, P250 sa lower box, P350 sa
reserved seats ug P500 sa VIP/ringside. (BANAT NEWS)