Knockout giapas ni Casimero
CEBU, Philippines - "Knockout maoy bugtong paglaum ni IBF light flyweight champion Johnriel 'Quadro Alas' Casimero (17-2, 10KOs) aron madepensahan niya ang iyang bakus
batok sa Panamanian challenger Luis 'Pan Blanco' Rios (18-1, 13KOs) sa Marso 16 didto sa Megapolis Convention Center sa Panama.
Ang taga-Ormoc City nga si Casimero misaysay nga dili na siya bag-o sa pag-away sa laing nasud, apan
aduna siya'y gamay'ng kabalaka sa posibleng usa ka "hometown decision" kun ugaling moabot sa 12 rounds ang ilang
away.
"Wa man ko'y problema nga moaway didto sa Panama, pero nanghinaut ko nga patas ang desisyon unya sa
mga judges," matud pa sa 22-anyos nga Pinoy world champion.
Tungod niini, buhaton ni Casimero ang tanan aron ma-knockout si Rios ug dili na kinahanglan nga mapunta pa
sa mga hurado ang katungod nga mohukom sa ilang away.
"Knockout gyud akong apason kay maseguro nga mouli ko sa Pilipinas nga naa pa akong bakus," dugang pa ni
Casimero.
Si Casimero misakmit sa IBF title human niya gipaundang sa tenth round ang Argentinian nga si Luis Albert
Lazarte niadtong Pebrero sa miaging tuig didto sa Argentina nga miresulta sa usa ka "lamok-lamok."
Napanalipdan niya ang iyang bakus human midaog pinaagi sa "split decision" batok sa Mehikanong si Pedro
Guevara didto sa Mexico. (BANAT NEWS)
- Latest
