CEBU, Philippines - Ang elite riders gikan sa Denmark nga si Nikolaj Larsen maoy naghari sa international division sa Cebu leg sa 2013 Kopiko Astig 3-in-1 Supercross National Series niadtong Domingo didto sa South Road Properties (SRP).
Gisundan siya sa iyang kababayan nga si Matias Jorgensen, samtang ang pambato sa Sugbo ug Team captain sa Team Kopiko nga si Jon-Jon Adlawan mi-okupar sa ikatulong dapit.
Si Larsen mao sab ang nidominar sa pro open category batok sa Philippine No. 1 rider nga si Glenn Aguilar, kinsa mipahiluna sa ikaduhang dapit, gisundan ni Adlawan nga mikapyot sa ikatulo.
Si Jorgensen nakabawi dihang siya ang mikampiyon sa pro life class batok nila ni Rhowell Matias Mangosong ug Adlawan nga miangkon sa ikaduha ug ikatulong dapit.
Ang anak ni Glenn Aguilar nga si McLean maoy midaog sa mini class ug beginners open production, samtang si Jacob Orber mirehistro og double-victory sa novice production ug intermediate class.
Si Janelle Saulog maoy nanghawod sa women’s open division, samtang si Ariel Lacnit ug Jay Lacnit maoy midominar sa veterans A ug B.
Si Ayen Ledesma misakmit sa open enduro title, samtang sila si Malbert Rama ug Jaypee Glenn Gaid nag-una sa underbone ug peewee 50 class.