CEBU, Philippines - Nadawat na ni ALA Promotions CEO Michael Aldeguer nga lisud na nga mag-abot ang dalan ni WBO/WBA flyweight champion Brian Viloria ug sa ilang boksidor nga si Milan Melindo.
Kini human usab sa kompirmasyon nga ang Fil-American boxing champion nga si Viloria modepensa sa iyang bakus batok sa Nicaraguan champion nga si Roman Gonzales sa sayong bahin ning tuiga.
Tungod niini, dili na pugson ni Aldeguer ang No.1 contender nga si Melindo sa pakigsangka ni Viloria.
Gitun-an nila karon nga dad-on nila dinhi sa Pilipinas ang kanhi Mexican champion nga si Hernan Marquez aron iparang ngadto ni Melindo.
"Let’s understand Viloria, he really doesn’t want to fight a fellow Filipino and we will now support him for that," matud pa ni Aldeguer.
Si Marquez maoy kanhi WBA title-holder sa wala pa siya mapilde ngadto ni Viloria sa ilang "unification bout' niadtong Nobiyembre sa miaging tuig.
Kun magkasabot, ang Melindo-Marquez showdown itakda sa Hunyo ning tuiga didto sa SM Mall-of-Asia Arena.