Pacquiao-Marquez IV mikita og 1.15 million PPV

CEBU, Philippines - Mikita og 1.15 million pay-per-view buys ang makasaysayanong ikaupat nga sangka nila ni Manny Pacquiao ug Juan Manuel Marquez niadtong miaging Disyembre 9 didto sa MGM Arena Las Vegas.

Kini ang gipagawas ni Top Rank Inc. CEO Bob Arum kinsa nagkanayon nga wala siya masayup sa iyang pangagpas nga magmalampuson ang fourth fight nila ni Pacquiao ug Marquez.

Sa maong sangka gipakuratan ni Marquez ang tibuok kalibutan sa boxing human niya gipatug sa sixth round si Pacquiao aron makuha ang WBO ‘Champion of the Decade’ belt.

Si Arum nagkanayon seguradong malipay sila si Pacquiao ug Marquez tungod kay mapun-an ang ilang kinitaan tungod usab sa $70 million nga domestic television revenue sa ilang sangka.

"We are happy. It's a very big success," matud pa ni Arum kinsa atoa sa Houston, Texas aron mutan-aw sa sangka ni Nonito Donaire ug Jorge Arce.

Sa maong kalambuan, nalabwan usab ni Pacquiao ang miagi niining pay-per-view sales batok ni Tim Bradley niadtong Hunyo nga igo lang mikita og 900,000.

Labing dakung nahimong pay-per-view sales sa usa ka away ni Pacquiao mao ang ikatulong sangka niya ni Marquez niadtong miaging tuig diin mirehistro sila og 1.25 million PPV buys.

Sa laing bahin, gipagawas usab sa Nevada State Athletics Commission ang halin sa ticket sales nga miabot ngadto sa $10,888,890.