Compostela temporaryong nag-una sa kiddies division sa 2012 GUV Cup

 CEBU, Philippines -  Miligwat sa ilang ikatulong sunod-sunod nga daog ang Compostela aron temporaryong mag-una sa Group-A sa kiddies division sa 2012 Governor Gwen Garcia Unity Volleyball (GUV) Cup didto sa Cebu International Convention Center (CICC) sa Mandaue City.

 Human midaog pinaagi sa "default" batok sa Bantayan, ang Compostela mipilde sa Asturias, 25-24, 25-15 ug sa Alegria, 25-23, 25-7  aron magpabiling walay pilde sa quarterfinal round.
 Nagsunod sa Compostela mao ang Catmon nga adunay 2-0 nga baraha. Mihipos sa ilang unang daog ang Catmon pinaagi sa "fortfeiture" batok sa Bantayan ug ang ikaduha nilang daog batok sa Talisay City, 25-14, 25-14.
 Hinuon, ang  Talisay daling nakarekober ug ilang gipilde ang Alegria aron mo-okupar sa ikatulo nga dapit uban ang 2-1 nga baraha, gisundan sa Asturias nga adunay 1-1 nga baraha.
 Ang Asturias nidaog pinaagi sa pagpilde sa Alegria, 25-17, 25-14.
 Sa Group-B, ang defending champion Mandaue City, Moalboal ug Tabogon nagsawo sa liderato sa managsama nilang 2-0 nga baraha.
 Gipilde sa Mandaue ang Sta. Fe, 25-15, 25-21 ug Tabuelan, 25-9, 25-6. Ang Moalboal mipukan sa Carcar ug Tabuelan, 25-8, 25-15, samtang ang Tabogon mitamparos sa Carcar, 25-13, 25-19 ug sa Sta. Fe, 25-22, 25-21.  (BANAT NEWS)