CEBU, Philippines - Ang Talisay City volleybelles milansang sa ilang ikatulong sunod-sunod nga daog pinaagi sa pagpilde sa Tabogon sa straight sets sa quarterfinal round sa 2012 Governor Gwen Garcia Unity Volleyball (GUV) Cup sa miaging adlaw didto sa Cebu International Convention Center (CICC) sa Mandaue City.
Nagkinahanglan lang ang Talisay og 42 minutos sa pagpukan sa Tabogon, 25-17, 25-21 aron magsolo sa liderato sa women's Group A bitbit ang 3-0 nga baraha.
Ikaduha ang Liloan nga adunay 2-0 nga baraha, samtang ang Sta. Fe ug Toledo City nagsawo sa ikatulong dapit sa managsama nilang 2-1 win-loss records.
Ang Sta. Fe nakatagamtam sa ilang unang kapildihan batok sa Toledo. Ang Sta. Fe nidaog sa unang set, 25-20, apan ang Toledo miharos sa sunod nga duha ka sets, 25-17, 25-16 aron angkonon ang daog.
Hinuon, ang Sta. Fe daling nakarekober ug ilang gipahimungtan ang Tabogon sa iskor nga 25-17, 25-19.
Sa Group B, ang defending champion Mandaue City midemolis sa Oslob, 25-4, 25-8 alang sa ilang ikaduhang daog.
Apan ang lider sa Group B mao ang Catmon ug Minglanilla nga parehong nagbitbit og 3-0 nga baraha.
Human midaog pinaagi sa forteiture batok sa Bantayan, ang Catmon mimakmak sa Tabuelan, 25-11, 25-7, samtang ang Minglanilla miposte sa ilang ikatulong daog gikan sa mga kamot sa Alegria sud sa tulo ka sets, 23-25, 25-20, 25-21. (BANAT NEWS)