CEBU, Philippines - Kun wala pa lang mahitabo ang knockout sa sixth round, hayan daku unta og puruhan nga midaog si Filipino boxing icon Manny Pacquiao ilabi na kun milungtad og dugay ang maong away.
Kini ang panahom ni ALA Promotions President Michael Aldeguer kinsa nagkanayon nga bisan pa sa ngil-ad niyang kapildehan sa kamot ni Juan Manuel Marquez, mibilib siya sa gipakitang lihok ni Pacquiao.
Itandi sa away ni Pacquiao batok ni undefeated American Tim Bradley, nakita ni Aldeguer nga migawas ang abilidad ni Pacquiao sa away diin gigamit niya ang iyang kapaspas ug kusug aron mihimo og knockdown ug mobuak sa ilong ni Marquez sa fifth round.
“Sayang, it was very sad that he (Pacquiao) got knocked down, Manny was gaining momentum,” matud pa ni Aldeguer sa pakighinabi sa Banat News.
Sa compubox, si Pacquiao naglabaw nga adunay 37% punches connected, itandi ni Marquez nga aduna lay 21%. Mas daghan usab ang power punches ni Pacquiao nga mipasud og 68, samtang si Marquez nakaigo lang og kusug ni Pacquiao sa 41 ka beses.
Gisupak usab ni Aldeguer ang pagtuo sa uban nga nagkompiyansa si Pacquiao rasun nga nasugamak siya sa tuong kumo ni Marquez.
“He was not overconfident, that’s boxing gyud and Marquez just landed a clean shot that ended the fight.”
Dugang pa ni Aldeguer nga gusto niya nga adunay fifth fight, apan nabalaka usab siya sa panglawas ni Pacquiao human ang maong knockout.
Sa iyang bahin, si ALA chief trainer Edito Villamor nagkanayon nga daku og natabang ni Marquez ang gihimo niining pagpadako sa lawas tungod kay napun-an ang kusug sa kumo niini nga maoy ilang gigamit batok ni Pacquiao.
“Daku ang lawas ni Marquez grabe iyang training mao to ang usa sa iyang mga alas,” matud pa ni Villamor. (BANAT NEWS)