CEBU, Philippines - Plansado na ang tanan alang sa 2012 Don Bosco Football Festival nga mosikad karong weekend didto sa Don Bosco Technological Center (DBTC) field sa barangay Punta Princesa, ning siyudad.
Onse ka age-groups ang naglatid ning duha ka adlaw nga kompetisyon.
Kini naglakip sa boys 6, 8, 10, 12, 14 ug 17-under, inter-BPO, 38-above, girls 17 ug men's and ladies open.
Kasagaran sa mga duwa himuon sa Disyembre 8, samtang ang aksiyon sa men's ug ladies open, inter-BPO ug 38-above sa sunod adlaw.
Nanawagan ang mga tigpasiugda ning kalihukan nga gipangulohan ni coach Glenn Ramos ngadto sa interesadong koponan sa pagpadayag sa ilang partisipasyon sa mas labing daling panahon aron mahapsay ang pagpadagan sa maong kompetisyon. (BANAT SPORTS)