CEBU, Philippines - Nakatilaw na gyud og daog ang Sector 5 pinaagi sa pagpilde sa Sector 3, 38-29 ubos sa juniors division sa nagpadayong aksiyon sa Katipunan ng mga Kabataan Sectoral Basketball Tournament sa barangay Pagsabungan niadtong Biyernes sa gabii didto sa basketball court sa nahisgutang barangay sa Mandaue City.
Ang Sector 5 ni sectoral Marnelle Frances Abayan nagsalig sa ilang hugot nga depensa sa second half ug sa nagtuasik nga mga puntos aron mailog ang tiyempo sa duwa.
Unang nakaiskor ang Sector 5, apan naungot kini dihang mibawos ang Sector 3 ni sectoral councilor Jovie Suson pinaagi sa ilang 10-0 run alang sa ilang 10-2 nga bentaha.
Apan bisan pa niini, ang Sector 5 ni coach Robinson 'Osong' Daquiado mikalingaw og kitkit sa labaw hangtod nga misikit kini sa iskor nga 17-18 sa halftime.
Diha na nakalabaw ang Sector 5 sa nanghinapos nga bahin sa third period 23-24 human sa basket ni Pablito 'LeBron' James' Seraña ug wala na kini molingi pa sukad niadto.
Si Juan Miguel Cenabre maoy topscorer sa Sector 5 nga miratsada og 15 puntos, samtang si Seraña mitimbre og 10 puntos alang sa ilang 1-2 nga baraha.
Ang pilderong Sector 3 nga nagbitbit sab og 1-2 nga baraha, gipangulohan ni Cyle Ricafort, kinsa miiskor og 13 puntos, gisundan ni Conde nga adunay 10 puntos.
Sa laing bahin, ang Sector 1 ni sectoral councilor Renante Mondijar milansang sa ilang ikaduhang daog human maka-eskapo bitbit ang 35-33 nga kadaugan batok sa Sector 6 ni sectoral councilor Ronel Surbano.
Sa gihapon, si Jayvee Corbo mao na usab ang nangulo sa kadaugan pinaagi sa iyang 17 puntos, gisundan ni Patrick Gacrama nga adunay 11 puntos.
Sila si Gretchie Paglinawan ug Christopher Molit nagkumboya og 21 puntos alang sa Sector 6 nga wala pa makatilaw og daog sud sa tulo ka duwa. (BANAT NEWS)
PUNTOS MATAG USA
Unang duwa:
SECTOR 1 (35) - Corbo 17, Gacrama 11, Taran 4, Pinote 2, Mondijar 1
SECTOR 6 (33) - Paglinawan 11, Molit 10, Perez 8, Chow 4
Ikaduhang duwa:
SECTOR 5 (38) - Cenabre 15, Pablito 10, Ranile 7, Quindao 4, Giganto 2
SECTOR 3 (29) - Ricafort 13, Conde 10, Chua 4, Canoy 2