Tubid miluwassa Barako Bull

CEBU, Philippines - Nagsilbe nga bayani alang sa Barako Bull Energy Cola ang ilang swingman nga si Ronald Tubid kinsa mipasulod sa game-winning shot sa nahibiling 18 segundo aron ihatag sa iyang koponan ang daog batok sa Global Port Batang Pier, 95-94, kagahapon didto sa Smart  Araneta Coliseum.

Sa maong kadaugan ang Barako Bull misaka karon sa 3-5 win-loss record ug misakmit sa ikapitong dapit sa standing sa nagpadayong elimination round sa PBA Philippine Cup.

Nagukod og syete puntos ang Barako Bull sa Global Port sa 6:49 sa third period, dihang nanginit sa opensa si Richard Yee kinsa mirehistro sa iyang conference-high 20 puntos.

Hinay-hinay nga miapas ang Barako Bull sa final period tungod sa paningkamot ni Enrico Villanueva, samtang sa three-pointer ni Tubid maoy mikitkit sa labaw sa Global Port ngadto sa tres puntos, 89-91, sa katapusang 3:13 sa duwa.

Naglabaw og uno punto ang Batang Pier sa nahibiling 30 segundos, 94-93, apan usa ka krusyal nga tira gikan ni Tubid gikan sa pasa ni Sean Anthony sa naghinapos nga 18 segundos ang miselyado sa daog sa Barako.

May kahigayunan ang Global Port nga makuha ang daog, apan mikagar ang buzzer-beating triple ni Josh Vanlandingham. Sa maong kapildehan ang Global Port nahagsa sa katapusang dapit sa standing sa ilang 1-7 record.

Si Tubid miiskor og 19 puntos, samtang si Villanueva mirehistro og double-double 18 puntos ug 11 ka rebounds. (BANAT)