CEBU, Philippines - Nagmadaugon ang Brooklyn sa ilang pagbalik og duwa sa usa ka major pro sports niadtong Sabado human modaug ang Nets batok sa Toronto Raptors sa iskor, 107-100 sa labing una nilang duwa didto sa Barclays Center didto sa New York City.
Nalugwayan pa gyud og pipila ka adlaw ang 55 ka tuig nga pinaabot sa Brookyln tungod sa paglampaso sa Superstorm Sandy una pa makaangkon ang maong dakbayan og team nga matawag gyu'ng ilaha ug nagtuo ang Nets nga maayo kaayo ang maong lakang.
Miposa og 27 puntos si Brook Lopez ug midugang si Deron Williams og 19 puntos uban sa iyang siyam ka assists alang sa Nets samtang silang C.J. Watson ug Joe Johnson mitikdol og 15 ug 14 puntos matag usa.
Usa ka sold out crowd ang misaksi sa duwa nga mokabat og 17,732 ka fans nga naglakip sab sa pipila ka mga entertainers ug usa niini si Jay-Z kinsa part-owner sa team ug iyang asawa nga si Beyonce nga nag-abiba ''Brooklyn! Brooklyn!'' sa pipila ka higayon atol sa duwa ug nag-anam ka kusog atol sa kadaugan.
May katarungan silang malipay tungod kay wala nay team ang Brooklyn sukad mibalhin ang Dodgers ngadto sa Los Angeles niadtong 1957.
Si Kyle Lowry mihimo'g 28 puntos alang sa 0-2 nga Raptors samtang si DeMar DeRozan miamot og 25 puntos.
Mo-debut na unta ang Nets niadtong Huwebes batok sa Knicks apan giuswag kini nunot sa hangyo ni Mayor Michael Bloomberg tungod kay malisod ang pagbiyahe ngadto sa Barclays Center ug delikado sab sa mga motorista tungod kay walay operasyon ang ilang mass-transit system.
Ang Nets adto gihapon magpraktisan sa East Rutherford, New Jersey ug mibalhin sila'g workouts didto sa Barclays Center sa miaging semana tungod kay gibahaan ang maong lugar ug ang ubang mga sakop sa team napugos og puyo sa hotel.
Si NBA commissioner David Stern nga kanhi gi-boo, gipakpakan na dihang nagkanayon siya nga ''welcome Brooklyn, USA to the NBA."
Si Williams maoy unang nakapasulod og basket didto sa Barclays Center. (GGM gikan sa NBA.com) (BANAT )