Aguilar moduble sa paningkamot

CEBU, Philippines - Human siya ma-draft sa NBA Developmental League, misaad karon ang Filipino basketball player nga si Japeth Aguilar nga moduble sa iyang paningkamot aron matuman ang iyang damgo nga makaduwa sa NBA.

Nabuhian sa paglaum nga mahimong labing unang Pinoy nga makaduwa sa NBA si Aguilar dihang nakasud siya sa NBA D-League diin gikuha siya sa Santa Cruz Warriors nga maoy affiliated team  sa Golden State Warriors sa NBA.

“God is in control of everything. I will work hard for the next two weeks,” matud pa sa 6-foot-9 og kanhi PBA No.1 pick nga si Aguilar. “Equal opportunity here. It’s just a matter of working hard.”

Gikataho nga miabot sa 263 ka mga aspirants ang nagpapili sa D-League nga adunay 16 ka koponan, apan pipila ra ang naswertehan nga napilian lakip na niini si Aguilar kinsa maoy ika-109th pick.

Sa iyang bahin, ang kanhi coach ni Aguilar sa Talk N’ Text Tropang Texters nga si Chot Reyes mipadayag sa iyang kalipay ug garbo sa pagkasulod ni Aguilar sa NBA D-League.“Good for him. I wish his the best,” segun pa ni Reyes sa iyang twitter account.

Ang 2012-2013 season sa NBA D-League sugdan sa Nobiyembre 23, samtang ang Warriors magsugod sa ilang kampaniya sa Nobiyembre 30 batok sa Reno Bighorns. (gikan sa Philstar) (BANAT)