CEBU, Philippines - Misaad si Mexican boxing legend Jorge Arce nga moretiro sa boxing kun mapilde siya batok ni four-division world champion Nonito Donaire sa giplanohan nilang sangka sa Disyembre 15 didto sa Texas.
Si Arce nagkanayon nga wa siya'y bilib sa abilidad ni Donaire kinsa maoy WBO ug WBC diamond belt super bantamweight champion.
Tungod niini, andam siya nga moretiro sa boxing kun ugaling mapukan siya sa Filipino boxing superstar.
“There are different ways to lose. I get beat overwhelmingly, then I would think that I have nothing to do in boxing and I would retire permanently,” matud pa sa kanhi Mexican champion.
Si Arce usa sa mga sikat nga Mexican boxer sa iyang henerasyon adunay record nga 61-6, 46KOs, samtang ang Fil-American nga si Donaire nagbitbit og record nga 30-1, 19KOs. (LPM gikan sa boxingscene.com) (BANAT SPORTS)