Pacquiao di pasamok

CEBU, Philippines - Sugdan na ni Manny Pacquiao ang iyang makutas nga training camp didto sa Wild Card Gym, apan mismo ang Filipino boxing superstar ang mihangyo sa iyang mga boxing fans nga dili una siya samukon sa iyang ensayo.

Sa pakighinabi sa Philboxing.com, si Pacquiao personal nga nangayo og pagsabot ngadto sa iyang mga boxing fans didto sa Estados Unidos ug sa iyang mga kababayan nga dili lang una mag-apong didto sa Wild Card Gym aron usab makatarung siya og ensayo.

“Boxing fans, our kababayans included, must understand our goal. Kaya sana they understand na gagawin naming itong ilang restrictions na ito para na rin mabigyan ko sila ng magandang laban at magandang resulta,” matud pa ni Pacquiao.

Nasayran nga una nang gimando ni Hall-of-Famer trainer Freddie Roach nga sirad-an ang Wild Card Gym kun ugaling mag-ensayo si Pacquiao aron makalikay sa distraksyon.

Si Pacquiao nagsugod sa iyang conditioning didto sa General Santos City ug mutapos sa iyang ensayo didto sa Wild Card alang sa iyang fourth fight batok ni Juan Manuel Marquez sa Disyembre 8 didto sa MGM Arena sa Las Vegas.

Si Roach kinsa dugay nang nagpaabot ni Pacquiao mibutyag usab nga andam na ang iyang mga boxers nga himuong sparring mates ni Pacquiao nga naglakip nila ni welterweight prospect Frank Gomez, Ruslan Provodnikov ug veteran Rey Beltran. (BANAT SPORTS)