Disiplina kinahanglan

Kun sa una kutob lang ko sa ilang ganghaan kay duna ko'y kuhaon, sa labing unang higayon nakataak na gyud ko sud sa tugkaran sa ABS-CBN Complex sa Jagobiao, Mandaue City niadtong Huwebes sa miaging semana. Nagparehistro man gud kong daan alang sa umaabot nga DYAB Kapamilya Run nga gikatakda karong Hulyo 17. Wala hinuon ko maihas sa maong dapit ilabi na kay ang miabi-abi nako mao man ang ambongan nakong higala nga si June Perez.

* * *

Kay lagi 12K man ang dibisyon nga akong daganan, kinahanglan gyud ta og praktis. Mao na nga nianang pagka hapon, nakahukom ko nga mag-jogging sa Cebu City Sports Center kay gusto nakong pahinisan sa akong rubber shoes ang bag-ong rubberized track oval sa maong pasilidad.

Human mibayad sa entrance nga P15, milahos ko sa baggage counter aron i-deposito ang dala nakong mga gamit. Dihang ako nang nakita ang kinatibuk-an sa oval, akong paminaw mura'g naa ko sud sa peryahan gumikan sa kadaghan sa mga tawo.

Sa wala pa gi-renovate ang track oval, makadaghan nako naka-jogging sa CCSC, apan moangkon ko nga niadto pa lamang tungora ako nakakita sa susamang gidaghanon sa mga tawo sud sa oval. Grabe kadasok ang tawo nga gamay na lang kaayo ang imohang espasyo sa pagdagan.

* * *

Wala may problema kun daghan ang tawo nga mag-jogging kay dili man nato sila kapugngan. Ang problema kay maglisud ka pagbulhot gumikan na sab sa way pagkabana sa uban mga nag-jogging. Tiaw mo ba nang dunay usa ka panon nga magsige lang og lakaw unya upat ka buok magtupad nga nagtuo silang naglakaw sila sa karsada nga sila'y nakapanag-iya.

Para nako, ang uban wala man to mag-jogging ba. Naglaroy-laroy man to sila kay nagtabi samtang naglakaw. Ang nakaapan, mga batan-on ra ba ug walay rason nga sila nakutasan sa tibuok nilang pagtuyok sa oval. Dili man ta makabuot sa ilang buhaton apan ila tang huna-hunaon nga dili lang sila maoy naggamit sa maong pasilidad. Kun tuyo nila maglakaw-lakaw, mopadaplin unta sila aron dili sila makaperwisyo niadtong mga seryoso nga nagdagan.

Sa wala pa ko modagan, nagkahimamat mi ni CCSC general manager Ricky Ballesteros. Wala ko makapangutana niya kun na-implementar na ba nila ang bag-ong polisiya. Naobserbahan man gud nako nga daghan gihapon kaayo ang anaa sud sa oval ang wala magsul-ot og rubber shoes. Duna sab ko'y nasigpatan nga nagkaon og kendi nga pataka lang og labay sa iyang wrapper. Duna say mga nagpabadlong nga ning-apil sa aerobics nga gikan-an ang nag-unang duha ka lanes sa oval. Imbes modiretso ang imong dagan, molihay pa ka gumikan kay kun molahos ka, imo silang mabanggaan.

Nindot na kaayo tan-awon ang oval kay bag-o pa kaayo kini. Hamugaway sab daganan kay humok kaayo ang rubber nga bag-o pa kaayong gi-estalar. Ang ako lang awhag sa mga nagduma sa CCSC labi na ngadtong Sir Ricky nga istriktohon unta pag-implementar ang mga regulasyon nga gusto nilang ipatuman alang sa kaayohan sa mga mogamit sa oval. Para nako, disiplina ang kinahanglan, labi na ngadto sa mga badlungon aron mahapsay ang paggamit sa maong pasilidad sa kinabag-an.

* * *

Ako diay mainiton nga pagtimbaya ngadto ni Hershey 'Sweet' Villacarlos Lacson, ang usa sa labing maanyag nga kawani sa Treasurer's Office diha sa municipal hall sa Madridejos, isla sa Bantayan nga magsaulog sa adlaw niyang natawhan karong Mayo 13. Advance happy birthday Nang Sweet! All the best and may God bless you always.

* * *

Kun dunay mga komentaro o reaksiyon mahimong mo-email sa [email protected] o sa [email protected]  (BANAT SPORTS)