Brgy Guadalupe, Cebu City
"Patabang unta mi sa problema namo sa basura diri sa Singson Village kay kanunay lang magtipun-og ug dugay kaayo kuhaon sa garbage collectors. Wala man gyud ni maatiman pag-ayo ang pagkolekta sa mga basura diri nga unta ari man mag-agian ang among kapitan.”
Brgy Maribago, Lapu-Lapu City
"Naa man gihapoy namaligya’g shabu diri sa Pag-utlan-Buyong ug daghan gihapon ang makit-an namo nga magmotor nga dili taga diri. Ang drug pusher diri may koneksyon kuno sa kapolisan."
Brgy Canjulao, Lapu-Lapu City
"Kada adlaw pa gyud gihapon ang sugal diri sa among barangay, hasta ang ilegal nga drugas naa gihapon. May mga tanod man unta nga makakita sa nagsugal pero dili man sila mobadlong.”
Brgy Gairan, Bogo City
“Nganong gidid-an na man mi nga managat gamit ang compressor nga kita man tanan ang tag-iya sa dagat? Kun kami ang pagbut-on, dili mi ganahan nga mogamit sa compressor kay delikado pero mao ra man ni ang among mahibaw-an nga panginabuhian.”
Brgy Poblacion, Liloan, Cebu
“May reklamo mi bahin niining tulo ka video karera machines sa usa ka lugar sa may merkado atbang ra sab gyud sa gihimo nilang tigbakayan. Asa na man diay ang mga polis diri sa lungsod nga wala man gyud makaaksyon niini?”
Brgy Valladolid, Carcar City
“Daghan na ang mga tawo ang nagyawyaw inig agi nila sa karsada sa Upper Tubod kay puwerte na gyud nga lapoka, panahon sa ting-uwan. Ang pasanginlan ra ba dayon kay ang mga motorsiklo.”
Brgy Dapdap, Cordova, Cebu
“Nahibulong lang ko nganong ang mga opisyal sa lungsod ug sa among barangay walay gihimo bahin sa mga ilegal nga kalihukan nga unta daghan man kaayo ang drugas ug sugal diri nga wala gyud atimana sa mga polis.”
Brgy Yati, Liloan, Cebu
“Hangyo lang unta mi nga ipa-monitor pag-ayo ang mga nalambigit sa ilegal nga drugas nga misurender na kay daghan ang nibalik man gihapon pagsuyop og shabu, ang mga pushers namaligya gihapon.”
Brgy Mambaling, Cebu City
“Reklamo ko bahin sa mga habalhabal driver nga nagbiyahean padung sa SM City Seaside kay magpataka na man lang og parking sa ilang mga motor. Kami na man lang ang maglikay kay anha man nila iparking ang motor sa sidewalk nga agianan man unta sa mga tawo.”
Brgy Lawaan 3, Talisay City
“Diri sa Sitio Pungsod nalipay na unta mi kay nisurender man ang iladong drug pusher pero ang nakaparat kay ang amahan na man ug laing igsoon niya ang mipuli pagpamaligya’g shabu. Unya magdaladala pa gyud og armas kining mga tawhana.”
Brgy Pulangbato, Cebu City
“Sa Sitio Dita kusog man gihapon ang shabu unya wala man ko makabantay nga naay taga diri nga naapil sa misurender sa Tukhang sa mga polis. Diri sa may kilid sa basketbolan naa gihapon diri namaligya.”
Alang sa inyong mga reklamo text lang sa 09326425494
- Latest
