Sa sinigaay sa mata tali sa administrasyon ni Presidente Ferdinand Marcos Jr. ug sa mga grupo sa mga batan-on nga nibisto sa kapin sa trilyon ka pesos nga pork barrel sa 2027 budget, ang mga politiko maoy unang nipilok:
Ang liderato sa House of Representatives, human nitawag nga ignorante sa mga nanaway sa budget, makigtagbo sa People’s Budget Coalition ug ubang mga grupo karong adlawa; ug
Ang Malakanyang, nga nidupa sa binilyon ka pesos nga budget insertions sa mga kongresista, nipasidaan na niadtong Martes nga i-veto sa presidente ang pork.
* * *
Ang mga batan-on nga nagtuon unsaon sa artificial intelligence pag-analisar ang kaliboan ka pahina nga nasudnong budget nisuway sa teknolohiya sa niaging tuig. Pero gi-isnab sa mga kongresista ang ilang emails ug mga imbitasyon sa pagtuki sa budget.
Wala sila mahibulong nga bisan sa flood control scandal gibinuangan gihapon ang 2026 budget. Kansang pipila ka probisyon, uban sa kinatibuk-an nga mga budget sa 2024 ug 2025, gideklarar sa Korte Suprema nga unconstitutional. Maong nakahukom ang mga gitawag nga “angry nerds” nga dili na tugotang magpadayon ang kinawatay sa 2027.
* * *
Nitambong sila sa budget deliberations sa House Appropriations Committee. Bisan gitak-opan sa publiko ang pipila sa mga tigom. Nipadayag sa ilang mga pangutana sa kuwestiyonableng insertions. Bisan gihatagan lang og tulo ka minuto sa pagsulti.
Dihang gi-aprobahan sa House ang ilang bersiyon sa budget, nga naglakip sa gipalusot nga kaliboan ka mga proyekto nga walay klarong mga dokumento, nidangop sila sa Senado ug sa publiko ug gibisto ang pakauwaw sa mga kongresista.
* * *
Ang paghangop sa katawhan sa pagpakabana sa mga batan-on gidasonan sa pasalig sa mga senador pagbabag sa tanang pork sa House, apil nang P4.3 bilyones sa distrito sa anak sa presidente nga si Sandro.
Tungod sa masuk-anong mga protesta sa mga batan-on sa 2025 nga nitay-og sa Indonesia ug Nepal, napugos si Marcos Jr. paghimo sa “Mahiya naman kayo!” nga State of the Nation Address. Atubangan sa mas masuk-anong mga protesta sa mga batan-on sa nagkalainlaing kanasuran karong tuiga, nga nitaktak na sa kurakot nga liderato sa Serbia, mahadlok siyang nga mo-risgo nga mas una pang mapalagpot kay ni Bise Presidente Sara Duterte.
* * *