EDITORYAL — Wala mawala ang POGO

Sa paglingkod ni Presidente Ferdinand Marcos Jr., gimando niya ang total ban sa Philippine Offshore Gaming Operations (POGO) ug kaning online casinos. Daghang gipangsirad-ang mga operasyon niini gikan sa nagkalainlaing mga probinsiya sa nasud.

Sa sinugdanan daghan ang nasilo kay daghan daw ang mawagtangan og trabaho nga mga empleyado aning mga kompanyaha.

Ang mga POGO nagsugod sa panahon sa administrasyong Duterte, sa mao sab nga panahon nilapad ang operasyon anang online gambling ug online sabong.

Apan dungan sab ani ang pagsaka sa mga krimen sama sa rape, extortion, kidnapping ug uban pang krimen nga gikalambigitan sa mga Chinese nationals, biktima man o mga suspek.

Nidagsa sab ang kinilo hangtud tone-toneladang shabu ug uban pang mga illegal drugs dinhi sa nasud ug ang pagdaghan sa mga Chinese nationals nga illegal nga nakasulod dinhi, ang uban nakaangkon pa gyud og mga Philippine IDs ug nakapalit og mga dagkong yuta dinhi ug nidaghan sab ang mga espiya sa Peoples Liberation Army sa China dinhi.

a operasyon tungod kay daghang pamilya ang naguba tungod sa pagkabuang sa uban sa maong sugal.

Apan bisan pa man niini, daghan gihapong mga nangasakpang padayung nag-operate og patago nga online gambling operations ug love scams dinhi, ug ang mga empleyado mga langyaw diin kadaghanan mga Chinese nationals.

Ning bag-ohay lang, moabot 200 ka langyaw ug kadaghan mga Chinese nationals ang nangadakpan sa lungsod sa Alicia ug Siay sa Zamboanga Sibugay kagahapon sa kadlawon, October 2.

Ang operasyon gilusad sa National Bureau of Investigation, Bureau of Immigration, 102nd Brigade Army’s 1st Infantry Division ug Police Regional Office 9.

Nagpasabot lang nga bisan sa paghigpit sa gobiyerno, nagpadayun gihapon ang operasyon sa nagkadaiyang sindikato sa illegal gambling sa mga Chinese dinhi sa nasud.

Dili ni sila mopadayun sa ilang operasyon kun walay mga impluwensiyadong mga Pilipino nga nagpaluyo kanila. Kasagaran sa mga impluwensiyado dinhi sa Pilipinas, mga politiko.

Hapit na ang eleksyon sa 2028, ug sama sa nakalabay nga eleksyon posibleng naa nasay mga politikong paluyohan sa mga sindikatong Chinese para naa silay masandigan sa ilang gambling ug illegal drug operations dinhi sa Pilipinas.