3 versus 1

Nagkauyon ang tulo ka mga retiradong chief justice sa Supreme Court nga naglakip sa Sugboanon nga si Hilario Davide Jr., Reynato Puno ug Artemio Panganiban nga dili “absolute” ang 16 votes aron makonbikto si Bise Presidente Sara Duterte sa impeachment case nga iyang giatubang sa Senado.

Ang tulo lakip sa upat ka mga giimbitar sa Senate Impeachment Court isip “amicus curiae” o mga higala sa korte aron motabang paggiya sa mga senator-judges sa ilang paghukom pila gyud ang gikinahanglang boto aron pagkonbikto sa bise presidente.

Ang laing membro sa “amicus curiae” mao si retired Associate Justice Adolfo Azcuna, kinsa dunay sukwahi nga baruganan og interpretasyon sa Constitution. Sigun ni Azcuna, 16 gyud ang kinahanglang botos aron makonbikto si Duterte sanglit mao kini ang katumbas sa two-thirds (2/3) sa 24 ka mga senador diin maoy gimando sa Batakang Balaod.

Gihimug-atan ni Azcuna nga ang Constitution nag-ingon nga aron makonbikto ang usa ka opisyal nga nag-atubang og impeachment trial gikinahanglan ang 2/3 sa tanang sakop sa Senado.

Apan lahi ang baruganan ug interpretasyon sa tulo ka mga retiradong chief justice. Alang ni Davide, ang 2/3 nga gimando sa balaod mag-agad sa gidaghanon sa mga senador nga qualified nga mobotar.

Isip usa sa mga sakop sa 1986 Constitutional Commission ug 1971 Constitutional Convention, gipasabot ni Davide nga gituyo nga fraction ang gigamit inay nga ang equivalent niini nga numero tungod kay posibling magkalahi ang mga sirkumstansiya sa pag-apply niini sa umaabot.

Gihimug-atan ni Davide nga lahi nga interpretasyon niini moresulta sa “absurdity” ug inhustisya. Nunot niini, maoy opininyon nilang Davide, Panganiban ug Puno nga ang 2/3 kinahanglang ibasi sa gidaghanon sa mga senator-judges nga nisalmot sa trial.

Nga sa ato pa dili mahimong iapil sa ihap ang mga senator nga nagtago-tago, napriso ug tua sa gawas sa nasud. Kun sundon o dili sa mga senator-judges ang opinyon sa tulo ka mga retiradong chief justice, kini masayran sunod semana diin gitakdang ilang butohan ang motion for reconsideration nga giduso ni Senator Erwin Tulfo sa ruling sa presiding officer nga si Chiz Escudero sa wala pa magsugod ang impeachment trial nga 16 ka botos ang gikinahanglan aron makonbikto ang bise presidente sa mga kasong iyang giatubang.

Bisan unsay mahimong desisyon sa impeachment court, matud ni Puno nga dili ni mahimong makwestiyon sa bisan asang hukmanan bisan pa didto sa Korte Suprema sanglit usa ni ka policy decision nga ang bugtong gahom iya lang sa impeachment court.