Padak-an ang multa sa mga tawong pataka lang og labay sa ilang basura. Mao nay gisugyot sa usa ka konsehal sa Cebu City tungod aning nagkagrabeng problema sa basura sa siyudad nga mao say gitudlo sab nga hinungdan nga nabara ang mga kanal ug mga sapa hinungdan sa grabeng pagbaha panahon sa tingulan.
Gisugyot ni Konsehal Konsehal Winston Pepito nga himuong P5,000 ang multa niadtong magpataka og labay og basura, kung dili mobayad, prisohon og usa ka tuig.
Gustong pa-amendahan ni Pepito ang Article 31 sa Ordinance No. 1361, o Garbage Ordinance sa siyudad. Kataposan kining giamendahan niadto pang 1994 pinaagi sa Ordinance No. 1512 nga ang multa P500 hangtud P1,000 o pagkabilanggo og usa hangtud sa unom ka buwan ug kompromisong multa nga P2,000 lamang.
Makita man karon nga wala mahadlok ang mga tawo. Pataka raman gihapon sila og dam-ok sa ilang basura diha sa daplin sa karsada, ilabi na ini’g lawom na ang gabii.
Bugtong mahinumdoman nga pipila ray nasilotan ani, kadto rang duha ka insidente diha sa Pasil area diin naay naaktohang naglabay og basura sa dagat sa miaging tuig ug ning tuiga.
Pero pagkatinuod dili man gyud unta to sila masakpan kung dili pa tungod sa concerned citizens nga naka-tayming og video sa ila ug ni-post ana sa social media, ayha pa nilihok ang mga otoridad.
Hain diay nang gipangsweldohan natong mga Barangay Environment Officers, mga sakop sa Cebu Environment Sanitation Office, mga barangay tanod ug uban pa?
Sa krimen ra diay gamit ang mga CCTV cameras sa mga barangay? Bisan nakita na nga naay nakalapas sa ordinansa, pasagdan lang?
Hangtud karon wala gyud silay pagtuon kun unsang orasa sagad pasekretong molabay og basura ang mga tawo sa ilang barangay?
Maayo lang nang multa kung naay mangugi og panakop, kay bisag usa ka milyon ka pesos pa na kung walay tarong nga law enforcement, wala gihapon nay pulos.