Unsaon pagsulbad sa problema kun ang uban sa atong mga magbabalaod magpataka lang og dasmag nga wala gani bisan gamay nga paningkamot pagtugkad unsa gyuy tinuod nga problema?
Human sa nahitabong pagpamusil sulod sa mga tunghaan didto sa Tacloban ug Zamboanga, diha dayoy sugyot sa ubang mga kongresista nga kuno amendahan ang balaod nga nagkontrolar sa paghupot ug pagpanag-iya og armas.
Gusto nilang pahugtan pa ang mga lagda sa pagpanag-iya og pusil sa mga civilian aron kuno masiguro nga ang haum lang gyud nga mga tawo ang makabaton niini.
Mao ni ilang tubag sa nahitabong pagpamusil sulod sa duha ka mga tunghaan nga naglambigit og mga minor de edad nga mga tinun-an.
Mao ni ang problema sa maong sugyot tungod kay dili ang balaod sa gun control maoy nagkuwang.
Kun gitun-an og maayo sa mga nagtinguha pag-amendar sa kasamtangan nga balaod mahitungod sa pagpanag-iya og armas ilang mahibaw-an nga dili husto ang solusyon nga ilang nahuna-hunaan.
Atong balikan ang duha ka mga nahitabong pagpamusil.
Didto sa Tacloban, kinsa may tag-iya sa armas nga gigamit sa estudyante nga namusil? Dili ba ang iyang iyaan nga pulis?
Didto sa Ateneo de Zamboanga University, anak sa usa ka opisyal sa Customs Police ang responsable ug mga armas sa iyang amahan ang gigamit sa krimen.
Niining duha ka mga insidente way armas sa civilian nga nalambigit sa krimin unya nganong ang solusyon nga nahuna-hunaan sa ubang mga bulok nga kongresista mao man ang pag-amendar sa balaod sa gun control nga ang maapektohan mao ang mga civilian ug lihitimo nga mga tag-iya og armas?
Ang hustong tubag sa problema mao ang gibutyag ni PNP Chief Melencio Nartatez Jr. nga higpitan ang mga lagda sa ilang mga sakop ug sa ubang mga law enforcement personnel nga dili magpataka og bilin sa ilang pusil.
Nganong ang mga civilian nga responsable sa ilang pagpanag-iya og armas ang silotan sa kadanghag ug ka irresponsable sa ubang mga tinugyanan sa balaod?