Sa akong pag-monitor sa ikalimang SONA ni Presidente Ferdinand Romualdez Marcos Jr. sa Facebook page sa Xfm 88.3 akong nakita nga pag-abot sa 15 minutos sa SONA sa Presidente mikanaug ang gidaghanon sa mga nananaw. Seguro ang mga wala molahutay sa pagpaminaw ug pagtanaw sa SONA wala na ganahi. Seguro nabasa na sa mga viewers nga wala molahutay sa SONA nga dili matinudanon ang Presidente sa iyang mga gipanulti o gitaho ngadto sa katawhang Pilipinhon.
Puwerteng pamakpak sa mga nanambong sa SONA sa Presidente dihang iyang giingon nga "dili lang siya presidente sa iyang pamilya ug mga higala, presidente siya sa Pilipinas nga adunay responsibilidad sa katawhang Pilipinhon". Pero kun nagsunod gyod ka sa SONA sa mga nahimong presidente sa Pilipinas makaingon ka nga nangopya ra si PBBM ni kanhi Presidente Erap Estrada nga miingon sa iyang SONA nga " walang kaibigan, walang kumpare, walang kamag-anak." Hinuon, gimodify og gamay ni PBBM ang kang Erap aron dili dali mabantayan.
Giingon ni PBBM nga sa dili madugay magpalupad na ang Pilipinas og rocket ngadto sa kawanangan sama sa ubang mga nasud. Gaya-gaya.
Sa laing bahin, dili matinud-anon ang Presidente sa iyang kontra korapsiyon nga kampanya. Hinuon makasabot ta kay kinsa man pod ang mounay og pukpok og martilyo sa iyang ulo. Aron aduna siyay mataho mahitungod sa iyang kontra korapsiyon, gipasakaan na sa Ombudsman og kaso for preliminary imbestigasyon sila si kanhi House Speaker Martin Romualdez ug kanhi kongresista Zaldy Co. Lipat-lipat lang ang gihimo sa Ombudsman. Sa kadugay na sa isyu ni Martin Romualdez mao pa ni ang ilang nahimo? Anaa pa gihapon sa preliminary investigation?
Wala itaho ni PBBM pila na ang utang sa nasud ug nganong nangotang siya. Wala pod niya itaho pila na ka asset sa gobyerno ang iyang nabaligya, pila ang halin niini ug asa niya kini gigamit.
Iyang ipawagtang ang bayranan sa system loss sa bill sa bayranan sa elektrisidad ug himoon nga P350k ang coverage sa withholding tax exemptions. Malipay unta ta ani pero magdepende pa ni sa kapaspas sa kongreso sa pag amendar sa balaud nga maghimo nga P350k ang tax exemptions sa mga minimum wage earners. Magpaabot nalang ta matinuod ba kini.