EDITORYAL - Paglaum ang Kabataan

Sa mga nahitabo sa atong kabataan karon, sa mga eskuylahan, sa komunidad ug bisan sa kaugalingong panimalay, makaingon gyud ta nga naay deperensiya kun giunsa sila pagpadako sa ilang mga ginikanan.

Managlahi ang pagpadako ug pagdala sa mga ginikanan sa ilang mga anak diha sa ilang mga panimalay, apan kana tanan dili matago kay makita na sa mga tawo diha sa gawas pinaagi sa taras sa ilang mga anak.

Mabantayan kini pinaagi sa ilang kinaiya, pakigsandurot sa uban ug labaw sa tanan ang ilang dinad-an sa ilang kaugalingon diha sa atubangan sa ubang mga tawo.

Ang mga batang matinahuron ug naay respeto sa uban, may pagtahod sa mga simpleng balaod sa ilang komunidad nagpakita kun unsa ka maayo ang ilang mga ginikanan sa pagpadako sa ila.

Mao nga dako ang papel sa mga ginikanan paghulma sa ilang mga anak para dili sila mahimong badlungon sa katilingban ug mahimo silang mapuslan sa nasud isip mga maayong Filipino.

Subo lang nga dili tanang ginikanan nahatagan og kahigayonan nga mahulma og tarong ang ilang mga anak tungod sa ilang pinansiyal nga estado.

Kinahanglan nilang motrabaho lapas sa normal nga mga oras tingtrabaho para mapun-an ang ilang kita kada adlaw.

Maayo unta kung dili man tuod kaayo mahatagan sa ginikanan og panahon ang ilang mga anak, motabang unta ang gobiyerno, pinaagi sa mga barangay pag-atiman sa mga kabataan.

Apan bisan gani ang mga sakop sa mga Sangguniang Kabataan sa barangay, wala magkadimao kay nangatakdan na sa pamolitika sa mga hamtong nga opisyal sa barangay, unsaon nila pagtabang ang ilang mga kaparehas nga kabataan?

Sa mga eskuylahan, dako sab og papel ang mga magtutudlo apan mura sab sila og nagapos tungod sa mga balaod nga nagdili na sa corporal punishment sa mga estudyanteng badlungon.

Nagkinahanglan sab ang magtutudlo og suporta dili lang gikan sa DepEd, kinahanglan sila og tabang sa ubang mga ahensiya sa gobiyerno para pagdisiplina aning mga tinun-ang badlungon.

Matud pa sa atong Nasudnong Bayaning si Dr. Jose Rizal, ang kabataan maoy paglaum sa atong nasud, pero unsaon man kun ang mga mogiya unta nila nagkulang man sa pagmatuto kanila.