Kamong mga babaye, pagmatngon gyud mo kay puwede na kamo karon nga makiha og rape kon mamugos mo namong mga lalaki nga makig-esmiringhoy ninyo.
Dunay babaye, gikonbikto gyud sa Supreme Court kay sayonan ka nga gipugos man niya ang iyang pag-umangkon nga makighilawas niya? Gikan sa Regional Trial Court (RTC), ngadto na sa Court of Appeals, pirming pilde ang babaye sa kaso.
Pag-abot sa Supreme Court, ang labaw’ng hukmanan wa gyud mousab sa desisyon nga gipakanaog sa lower courts.
Di ka tingali makatuo, kay karon ka pa makadungog nga dunay babaye nga makonbikto og pagpanglugos, kay sagad lalaki ra man ang manglugos.
Ang desisyon sa Korte Suprema naglambigit sa kaso (Annabelle M. vs. People of the Philippines, G.R. No. 280727, February 4, 2026.)
Gipasabot sa Republic Act No. 11648 nga ang rape dili ra kay mahimo sa usa ka lalaki ngadto sa usa ka babaye, pwede na sa babaye nga mamugos pakighilawas ngadto sa usa ka lalaki.
Sa wa pa ang R.A. No. 11648, gitataw sa balaod nga ang rape mahimo ra sa lalaki ngadto sa babaye. Apan karon, makasohan na og rape ang babaye kon siya maoy mamugos sa lalaki nga kutloon ang iyang pagka bulak.
Pero tungod kay pagkahitabo niining pagpamugos ni Anabelle ngadto sa 11-anyos niyang pag-umangkon nga angkonon siya usa ka gabii niana, wa pa man mahimo ang Republic Act 11648, gikonbikto lang siya og statutory acts of lasciviousness.
Pero kon nahitabo pa nga naa na ang maong balaod unya gihimo niya kadto, sigurado nga makonbikto siya sa rape. Gibasa gyud nako ang desisyon sa Supreme Court ug ang mga detalyi sa panghitabo, apan ngil-ad kon idetalyi nako dinhi.
Basta nga gipugos ni Anabelle ang iyang 11-anyos nga pag-umangkon sa pakighilawas kaniya. Si Anabelle niadtong higayona nagpangedaron og 25-anyos. Nahibaw-an man sa ginikanan sa bata ang hitabo kay gi-post man sa 11-anyos sa ilang group chat sa iyang mga amigo nga duna na siya’y experience sa babaye, uban sa usa ka college student.
Ang mama sa bata, mimando dayon sa iyang bana nga susihon, ug pagpangutana sa papa ngadto sa iyang anak, napugos kini pagtug-an nga ang iyang ante maoy gipasabot niya.
Kon maikag mo nga masayod sa panghitabo, i-search lang ang desisyon sa Supreme Court, aron matagbaw mo’g basa sa taas apan makapaikag nga sugilanon.
Usbon nako, kamong mga babaye pagmatngon gyud kay aron dili kamo mapasakaan og rape. Gipangutana ko sa akong amigo kon pananglit ako kuno ang mahitaboan, moreklamo ba kuno ko.
Giingnan nako ang akong amigo nga moreklamo gyud ko, kay abi pa lang sa uban kon masayod nga “burikot” ko kon dili ra moreklamo.