Sa akong pagtagik ning maong lindog gisaulog usab sa mga kapilya nga sakop sa akong Parokya ang piyesta ni San Jose Maria Escriva de Balaguer.
Tungod niining maong okasyon akong gisuwayan og research ang iyang mga panultihon ug usa sa nakita nako mao an kining gihimo natong ulohan sa atong lindog karon.
Matag usa nato buot og kabag-ohan sa kaugalingon. Buot kita og improvement. Buot kita og paglambo. Pangindahay kini ni bisan kinsa tingali.
Apan subo palandungon nga mura kita og mga ningas kogon. Maayo lamang sa sinugdanan. Paspas ug dali apan kadugayan mohinay og motapol. Sa laktod dili makalahutay.
Ngano man? Kini tungod kay ang dalan padulong sa kahingpitan sigpit ug malisod. Dugang pa, anaa ang krus nga pagapas-anon. ang mga santos mao man ang momatuod niini alang kanato.
Mao nga si San Jose Maria Escriva nagkanayon: “ To Begin is For Everyone, To Persevere is for Saints” sanglit ang paglahutay lamang ang makapahimo kanatong mga santos diha sa Ginoo.
Unta kining maong hagit alang kanato ato gyung makab-ot.
Kay ang mga tawo o mga panghitabo nga nagdala og kasakitan alang kanato diha sa atong panaw sa kinabuhi mamahimo mang kahimanan sa atong pagkabalaan. Viva San Jose Maria Escriva!