Nakuha na gyod ni Senador Sherwin Gatchalian ang presidency sa Senado human mitapon sa iyang kampo si Senador Joel Villanueva. Una nang mitabok sa kampo ni Gatchalian si Senador Chiz Escudero.
Ang pagtabok ni Escudero ugl Villanueva bunga sa pressure sa Malakanyang kinsa gihimo ang tanan aron makontrolar ang Senado aron maseguro nga masampongan ang nagkakusog nga alisngaw sa baho sa anomaliya sa flood control project.
Sa wala pa motabok si Escudero sa kampo ni Gatchalian daan nang nagpagawas og pamahayag si Ombudsman Jesus Crispin Remulla nga ila nang ipasaka ang kaso batok ni Escudero ug Martin Romualdez. Human sa pagtabok, wala nay balita ang Ombudsman sa pagpasaka og kaso batok ni Escudero. Nakaong-ong napod ang kaso ni Villanueva nga seguro mao ang bug-at nga hinungdan sa pagtabok niini sa kampo ni Gatchalian.
Sa testimonya sa mga kanhi body guard ni Zaldy Co ilang gipakita ang hulagway ug video nga maoy ilang ebidensiya sa ilang paghatod sa upat ka maleta nga puno sa kuwarta sa balay ni Escudero. Klaro kaayo ang ebidensiya batok ni Escudero.
Si Jinggoy Estrada nga wala kay makita nga ebidensiya batok kaniya mao hinuon ang unang naposasan ug nasulod sa prisohan kay wala siya magpadala sa pressure sa Malakanyang. Maingon nato nga mas maayo pa si Jinggoy kay adunay baruganan bahalag napriso. Iyang gipamatudan nga segurado siyang dili sadan.
Sa umaabot mga adlaw atong napanglantawan nga ang mga Senador nga may gipangtagoan nga baho mobali napod ngadto sa kampo ni Gatchalian.
Nagmalamposon ang Malakanyang. Dili na makabuwelo sa pag alisngaw ang baho sa anomaliya sa flood control project nga ang pundo niini gisulod sa maleta ug gibahin-bahin sa mga buaya.
Ang Blue Ribbon Committee nga pangulohan ni Erwin Tulfo ug Ping Lacson nga mag-imbestigar sa anomaliya sa Flood Control Project katuohan kaha? Ila kahang ipatawag ang 18 ka mga kanhi marines nga namasangil sa Chairman mismo nga si Erwin Tulfo nga nakadawat pod og kuwarta nga gisulod sa maleta?