Ning unang mga bulan sa akong pagpuyo dinhi sa Parokya sa Buanoy gipasiugdahan kining Meet and Greet Program. Dili lang kini mahitungod sa pakighimamat kondili mahitungod usab kini sa paghatag og mga serbisyo liturhikal ug sacramental ngadto sa mga parokyano.
Ang pagduaw sa mga kapilya ug pagsaulog sa mga Santos nga Misa uban kanila dako man kaayo og kahimoan aron sa ingon atong mahimamat ang mga katawhan nga sakop sa Parokya.
Dugang pa niini, ato usab nga gihimo ang DuPa kun Duaw Patigayon o Duaw Panimalay Program diin atong dad-on ang bendisyon sa Simbahan ngadto sa tagsa tagsa ka mga panimalay uban ang mga kaigsuonan sa Confradia del Carmen. Sila usab ang mosimba pagkasunod Dominggo hinalad ang mga bugas, groceries, school supplies ug uban pa. kining mga butanga ang ato pud ipaambit ngadto sa atong mga kabataan nga mag-apilan sa Sunday School Program ni Tay Inting. Dinhi sa among Parokya.
Mahinungdanon kaayo ang presensiya sa matag usa diha sa katilingban. Nagpasabot lamang kini nga bililhon ang matag usa ug konektado ang matag usa. Panahon ug kasinatian usab kini sa pagpakabana sa panginahanglan sa katilingban.
Pinaagi sa maong panagtagbo atong masayran kun kinsa kadtong wala pa makadawat sa mga sakramento ug kinsa kadtong dunay linain nga mga panginahanglan. Ning paagiha ang Parokya makahatag og tukma ug mga konkretong lakang aron pagsanong sa maong mga panginahanglan.
Nagpasabot lamang kini nga ang Parokya nagpakabana sa mga panginahanglan sa iyang mga anak. Kay ang Parokya mao man ang ginikanan ug ang mga parokyano mao ang iyang mga anak.
Unta kining maong pamaagi magmalampuson aron ang Parokya ug parokyano mopanaw ingon nga usa ka katilingban nga nagpaminaway sa panginahanglan sa usag usa.