Taas nga interest sa utang
Dear Atty. Divine,
Ang akong igsuon nangutang sa lending kay gigasto sa iyang pag-process sa mga papers padung sa abroad. Miabot og P50,000.00 ang iyang utang. Nabayran na ni mama ang katunga apan ang balance naa na say interest nga gipatong matag buwan. Di mi kasabot kun giunsa nila pag-compute ang interest nga dako pa man gihapon og bayranan ang akong igsuon bisan kun nabayrana na unta ang katunga. Unsay among buhaton? Daghang salamat.
Monique
* * *
Dear Monique,
Kun way gipirmahan nga kasabutan ang imong igsuon labot sa pagpahamtang og interest sa iyang giutang then way basis ang iyang giutangan nga mo charge kaniya og taas nga interest. Apan kun aduna siyay gipirmahan nga kasabutan mapugos gyud siya sa pagtuman niini bisan kun taas ang intrest. Basi sa Article 1956 sa atong Civil Code kini nagkanayon: " No interest shall be due unless it has been expressly stipulated in writing." Ang maayo ninyong buhaton mao ang pagsusi kun aduna bay gipirmahan nga agreement ang imong igsuon ug kun aduna gani silay pinirmahan, mas maayo nga pangitaan ninyo og paagi aron mabayran na ang utang ug di madak-an ang imong igsuon sa interest niini. Pangayuan sab ninyo og sumada ang lending company aron inyong masuta kun pilay ilang gi charge nga interest ug makareklamo mo kun wa masubay sa agreement ang ilang interest nga gipahamtang. Thank you and God bless.
Atty. Divine
* * *
Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
