Nagkagidlay

Sulod sa daghan na nga katuigan nahimong katambayayong sa dakbayan sa Sugbo ug sa Sinulog Foundation Incorporated (SFI) ang media aron i-promote ang Sinulog Festival.

Sukad niadtong analog pa ang telebisyon ug transistor radio ingon man black and white pa ang mga litrato sa mantalaan, ang media dako og natabang aron mailhan sa kalibutan ang tinuig nga Sinulog Festival.

Niining modernong panahon sa social media, way nausab nagpabilin ang suporta sa media sa Sugbo aron mapaabot sa nagkalain-laing kanasuran ang kamabolokon sa Sinulog ug sa samang higayon pagdani og mga langyaw nga moduaw dinhi sa Sugbo.

Hinaot nakit-an sa mga tagdumala sa SFI ug sa dakbayan sa Sugbo unsa ka mahinungdanon sa papel sa media aron makab-ot ang kasamtangan nga pagkainila sa Sinulog Festival.

Isip partner sa promotion sa Sinulog ug sa Sugbo, deserve sa mga sakop sa media sa Sugbo bisan dyutay’ng respito pinaagi sa paghatag nila og media lounge nga disente sama sa gihimo sa nanlabay’ng administrasyon sa Sugbo.

Apan sukwahi ang nahitabo kagahapon tungod kay daghan sa mga sakop sa media ang nagbagulbol tungod sa di maayo nga tratamento nila.

Sigun sa mga reporter nga didto sa Cebu City Sports Center, maguwang lang og dyutay sa stockroom ang ilang media center—way aircon ug daghang props nga gitambak. Dunay electric fan apan niabot alas 11 na sa udto.

Usa sa mga sakop sa media nga nag-cover sa Sinulog Grand Showdown didto sa CCSC mihulagway sa ilang kasinatian pinaagi sa social media nga, “The WORST EVER SINULOG MEDIA LOUNGE”. Iyang gitumbok ang usa ka Ryan Archival Villaflores nga maoy in-charge sa Sinulog Media Lounge.

Sigun sa mga reporter sa City Hall, si Villaflores nagsilbing consultant ni Mayor Nestor Archival ug maoy nagdumala sa Public Information Office (PIO) sa syudad.

Naghimo sab siyang sentro sa mga reklamo sa reporter nga nagcover sa City Hall tungod kay gawas nga arogante, magbuot unsay ipangutana sa media ngadto sa mayor.

Maayo tingaling tan-awon ni Mayor Archival angayan pa bang hatagan og katungdanan sa iyang administrasyon si Villaflores.

Kun dako gyud siya’g utang kabubut-on nga di niya mahimong paphaon si Villaflores, tingali mas makatabang sa iyang pamunoan og ibutang siya’g laing trabaho.

Ug mas dako og ikatampo sa pagpahumot sa nagkagidlay niyang pamunoan kun gikan sa media maoy iyang tugyanan pagdumala sa PIO. Kadtong nakasabot ug makamao sa trabaho sa media!