Ning atong pagsaulog sa Jubilee Year of Hope gibanhigan usab kita og mga nagkadaiyang mga kalisdanan ug hagit. Lakip na niini ang mga katalagman sa linog, bagyo ug baha. Ang hagit alang natong tanan mao man ang paghatag og paglaum alang sa atong isigkaingon.
Ang atong Artsidyosesis pinaagi sa CARITAS INC., ang nipahigayon ning Hatag Paglaum Program. Atong Nakita nga ang atong lokal nga simbahan ang wala lamang mag-urong sa mga panghitabo sa palibot. Hinunoa, nahimo siyang makugihon ingon man makanunayon sa pagpakita nga ang paglaum nga Diosnon mahimo diay nga sination sa mas konkreto nga paagi.
Bisan pa man kun tingali limitado ang mga tinubdan sa mga material nga mga pagpaambit apan ang gugma ug pagpanginlabot dili hitupngan. Dili limitado ang paghigugma kay mismo ang tuburan sa gugma nga mao ang Dios dili man mahakgom sa atong tawhanong panabot ug hunahuna. Atong hatagan og kahulogan ingon na acronym ang pulong nga HOPE
H kun Happiness. Batonan nato ang usa ka malipayong disposisyon sa kaugalingon ug kining maya nga disposisyon atong ipaambit kanila nga wala niini o dili ba kaha kanila nga naglisud sa pagdawat niini.
O kun Optimistic kita nga moharong sa mga pagsulay. After all ang tanan molabay lamang apil na ang atong mga suliran,
P kun PRAYER. Pun-on nato ang atong hunahuna ug pagbati sa mga concerns nga iya sa Dios aron iya usab nga pun-on ang iyang kaugalingon sa atong mga concerns.
E kun Empowerment. Atong dasigon ang atong kaugalingon sa mga butang maayo ug sa mga panlantaw nga maayo. Kay ang paghunahuna sa mga maayo dili man makapaluya nato. Hinumdomi: “SPES NON CONFUNDIT!” Hope does not disappoint!