Diha sa pagtabang

Niagi man sab gyud ko og natural disaster nga kasinatian sa dihang nadestino pa ako isip kura paroko sa Parokya ni San Jose, Madridejos, Alegria, Cebu.

Ang Bagyong Odette. Anaa gyud ang mga panginahanglan sa mga basic needs nga maglakip sa bugas, mga sabon, tubig, serbisyo ug uban pa.

Ang bagyong Odette dako kaayo og gikatudlo kanako ingon nga nakasinati ug ingon man usa ka lider sa katilingban labina diha sa paghimo og mga relief operations.

)Dili ikalimod nga sulod sa maong mga panghitabo anaa gyud nang pagbagulbol, pamintaha ug usahay anaa usab mga biktima ang nataligam-an.

Ug dili usab ikalimod nga daghang mga tawo nga kuno motabang sa mga biktima sa katalagman ang nitabang diay sa ilang kaugalingon ug dili sa mga biktima. Anaa gyud diay sa gihapon ang pamintaha ingon man paggamit sa mga biktima alang sa kinaugalingong katuyoan ug kaayohan.

Sa laing bahin, dili paigo ang pagkamadasigon sa pagtabang.

Kinahanglan usab ang usa ka hustong pagsabot kun nganong motabang kita. Nunot usab niini ang Sistema sa pagtabang.

Dili paigo ang kadasig ug kaikag mahinungdanon kaayo ang han-ay.

Kay ang bisan unsang mga buhat ug laraw nga way tinong han-ay ang mgadala gyud og kagubot. Ang kagubot nga magdala og tumang kalisod sa mga hingtungdan.

Pun-an pa sa mga bulok politika diha sa pagtabang. Kun dili kaalyado ato usab nga kalimtan ug agian lamang.

Ang mga katalagman nga nangagi sa atong kinabuhi makahatag unta kanato og leksiyon nga diha sa pagtinabangay kinahanglang ablihan ang mga paril sa kalainan.

Dili lang kini mahitungod sa resiliency kondili mahitungod kini sa consistency nga sa tinuoray kinahanglan mangandam kita uban ang pag-ampo sa Dios alang sa iyang panalipod.

Ug ang tukmang panahon kun higayon sa paghimo niini, karong mga panahona gyud.