Nahulog na ang tabil

Gihangyo ni DPWH Secretary Vince Dizon ang Professional Regulation Commission (PRC) nga rebokahon ang mga lisensya sa 20 ka personnel sa DPWH nga adunay giatubang nga kaso sa Ombudsman kabahin sa anomalosong mga flood control projects. Aduna gyu’y sangpotanan ang daotan’g binuhatan.  Kon matangtangan gayod ang mga hingtungdan sa ilang lisensya, dili na unya sila maka-praktis sa ilang propesyon ug mapadali usab pagtaktak kanila sa katungdanan.  Haum unya kanila ang linya sa drama sa radyo nga nagkanayon, “Nahulog na usab ang tabil sa atong sugilanon: ‘Ang mga Enhinyero’ng Kawatan’.”  Booww!

Nabali ang resulta

Mihatag ang Department of Agriculture og pagtugot nga moangkat og sibuyas-bombay, carrots ug broccoli sa tuyo nga ma-alibyohan ang nagsaka nga presyo sa maong mga produkto gumikan sa nagsunod-sunod nga dautan’g panahon.  Matag angkat nato og produkto sa gawas, ang himoon nga rason ug katuyoan mao ang pag-stabilize sa presyo sa merkado.  Apan base sa atong kasinatian, kini’ng polisiya sa pag-angkat wala gayod makapakunhod sa presyo, hinonoa, nabali hinoon ang resulta.  Komento pa sa akong amigo, “Pastilan kining atong gobiyerno, kon moingon gani nga mobarato ang paliton, ang suholan maoy gipasabot niana.”  Fezteleern!

Lansang sa kapakyasan

Gikompirmar sa Department of Tourism (DOT) nga adunay halapad nga pagkasanta sa sektor sa turismo sa Central Visayas human sa nasinati og 6.9 magnitude nga linog sa maong lugar.  Kini naka-apekto sa kapin 700 ka trabahante ug pagkasira sa daghan’g mga heritage sites, resorts ug cultural institutions.  Daan na man nga nagkaluya ang atong industriya sa turismo ug gihimo na lang nga alibi sa mga opisyales sa DOT ang linog aron ma-justify ang kakulelat sa atong performance.  Inay mangita’g epektibong pamaagi pagpalambo sa turismo, magpunay na hinoo’g pangita’g pasumangil.  Wala magtamod ang DOT sa panultihon nga “Ang kanunay nga pasumangil maoy mga lansang nga nagtukod sa balay sa kapakyasan."  Muleeng!

Compulsory donation

Nasikop sa mga awtoridad ang usa ka babaye nga naila sa alias nga “Janice” nga namaligya og 6,000 ka “DSWD Family Kits” sa kantidad nga tag-P2,588 matag “kit” bisan kon aduna kini marka nga “not for sale” ug gitatakan og “Bagong Pilipinas” logo.  Mirason ang dinakpan nga supplier kuno sila sa DSWD ug ang iyang gibaligya mga sobra lang nga supply apan ang logo ug marka nga “not for sale” maoy nakapa-kwestiyonable sa iyang gibuhat.  Tambag pa sa akong amigo, “Aron dili unta siya masita, miingon lang unta siya nga dili baligya ang mga Family Kit apan kinahanglan nga mohatag ang makadawat og ‘compulsory donation’.” Madahaan!

Hinaut nga naay snacks

Mopatuman ang Land Transportation Office og halapad nga paglahugay sa mga hepe sa mga district offices sa tibuok nasud aron matubag ang underperformance sa buhatan hilabi na sa pagpang-apod-apod sa mga plaka ug pagpangdakop sa mga wala marehistro nga mga sakyanan.  Dili garantiya nga ang pagbalhin sa usa ka bulay-og nga opisyal makapatunhay na sa pagdumala sa maong buhatan.  Aron dili maguol ang mga ibalhin nga opisyal sa LTO, “Manghinaut lang sila nga ang bag-ong buhatan adunay daghang lami-an nga snacks ug mas daghan nga ‘buhay-buhay’.”  Pagkatoytoy!